Օջալանը նոր ուղերձ է հղել՝ նշելով, որ խաղաղության գործընթացում անհրաժեշտ են օրենքներ

Քուրդիստանի աշխատավորական կուսակցության (PKK) բանտարկված առաջնորդ Աբդուլլահ Օջալանը նոր ուղերձ է հղել իր աջակիցներին զենքը վայր դնելու իր կոչի տարեդարձի կապակցությամբ։

Ուղերձը Անկարայում կարդացել է Ժողովուրդների հավասարություն և ժողովրդավարություն (DEM) կուսակցության համանախագահ Փերվին Բուլդանը՝ «Խաղաղության և ժողովրդավարական հասարակության կոչի առաջին տարեդարձը» խորագրով հանդիպման ժամանակ։ Բուլդանն ասել է, որ հայտարարությունը Օջալանը փոխանցել է DEM կուսակցության պատվիրակության հետ փետրվարի 16-ին կայացած հանդիպման ժամանակ։

Օջալանը  հայտարարել է, որ Թուրքիայում ժողովրդավարական ինտեգրման անցման համար անհրաժեշտ են խաղաղությանն առնչվող օրենքներ, գրում է Reuters-ը։ Գործակալությունն արձանագրում է, որ այս կարևորագույն կոչը հույսեր արթնացրեց հակամարտության ավարտի վերաբերյալ, որը խլել է ավելի քան 40,000 մարդու կյանք, սերմանել խորը պառակտումներ և կասեցրել զարգացումը Թուրքիայի հիմնականում քրդաբնակ հարավ-արևելքում, սակայն առաջընթացը դանդաղ է:

Օջալանի կոչը կարող է ընդունվել որպես ճանապարհային քարտեզի հավանություն, որը հաստատվել է անցյալ շաբաթ Թուրքիայի խորհրդարանական հանձնաժողովի կողմից և որը կոչ է անում իրավական բարեփոխումներին զուգահեռ իրականացնել Քուրդիստանի բանվորական կուսակցության զինաթափումը, չնայած իրականացման մանրամասները դեռևս մշուշոտ են։

«Ժողովրդավարական ինտեգրման անցումը պահանջում է խաղաղության օրենքներ»,- ասել է Օջալանը հայտարարության մեջ։ Ժողովրդավարական հասարակության լուծումը նախատեսում է «քաղաքական, սոցիալական, տնտեսական և մշակութային չափանիշներով իրավական շրջանակ, հավելել է նա։

PKK -ն անցյալ տարվա մայիսին հայտարարեց իր դիմակայության ավարտի մասին, իսկզինյալները անցյալ տարվա հուլիսին խորհրդանշական արարողության ժամանակ այրեցին որոշ զենքեր: Մի քանի ամիս անց PKK-ն հայտարարեց Թուրքիայից դուրս գալու մասին։ PKK -ն 1984 թվականից զինված պայքար է մղում թուրքական պետության դեմ, այն ճանաչվել է ահաբեկչական խմբավորում Թուրքիայի, Միացյալ Նահանգների և Եվրամիության կողմից: Սկզբում այն ​​ձգտում էր անկախ պետության, բայց հետագայում մեղմացրեց իր նպատակները՝ հայտարարելով, որ ցանկանում են հասնել ինքնավարության և քրդերի համար ավելի մեծ իրավունքների:

Թարգմանությունը՝ Էմմա Չոբանյանի