Ռուբիոն հայտարարել է, որ Իրանի կողմից հրթիռների շուրջ բանակցություններից հրաժարվելը մեծ խնդիր է

ԱՄՆ պետքարտուղար Մարկո Ռուբիոն զգուշացրել է, որ Իրանը պետք է բանակցություններ վարի իր հրթիռային ծրագրի շուրջ, այն բանից հետո, երբ նախագահ Դոնալդ Թրամփը հայտարարեց, որ Թեհրանը աշխատում է հրթիռների մշակման վրա, որոնք կարող են հարվածել Միացյալ Նահանգներին, գրում է Al Arabiya-ն ։

«Ես կասեի, որ Իրանի պնդումը՝ չքննարկել բալիստիկ հրթիռները, մեծ, մեծ խնդիր է», – լրագրողներին ասել է Ռուբիոն Միացյալ Նահանգների և Իրանի միջև նոր բանակցությունների նախօրեին։ Սակայն Ռուբիոն խուսափել է մանրամասնելուց, թե արդյոք Ժնևում կայանալիք բանակցությունները վճռորոշ կլինեն Միացյալ Նահանգների կողմից Իրանի վրա հարձակվելու որոշման հարցում։

«Նախագահը ցանկանում է դիվանագիտական ​​լուծումներ։ Նա դրանք շատ է նախընտրում», – ասել է Ռուբիոն Կարիբյան ավազանում գտնվող Սենթ Քիթս և Նևիս  պետություն կատարած այցի ժամանակ։

Իրանին հնարավոր հարվածի վերաբերյալ Ռուբիոն ասել է. «Նախագահը դեռևս որոշում չի կայացրել այդ հարցում, ուստի չգիտեմ՝ հինգշաբթին դրա համար կարևոր ամսաթիվ է, թե ոչ։ Կարծում եմ՝ առաջընթաց պետք է գրանցվի»։

Նշենք, որ Իրանը և Միացյալ Նահանգները պատրաստվում են հինգշաբթի օրը Ժնևում հանդիպել միջուկային բանակցությունների համար, որոնք համարվում են դիվանագիտության վերջին հնարավորություն, քանի որ ԱՄՆ-ն ​​Մերձավոր Արևելք է ուղարկել ինքնաթիռների և ռազմանավերի նավատորմ՝ Թեհրանի վրա համաձայնության հասնելու համար ճնշում գործադրելու համար։

Իրանական  պաշտոնական IRNA լրատվական գործակալությունը հաղորդում է, որ Իրանի արտաքին գործերի նախարար Աբբաս Արաղչին չորեքշաբթի երեկոյան Ժնևում հանդիպել է իր օմանցի գործընկեր Բադր բին Համադ ալ Բուսաիդիի հետ՝ այսօրվա բանակցություններից առաջ։

Օմանը միջնորդում է Շվեյցարիայում կայանալիք ԱՄՆ-Իրան անուղղակի բանակցությունները։

Նշենք, որ ամերիկյան կողմից բանակցություններին մասնակցում են բանագնացներ Սթիվ Ուիթկոֆն ու Ջարեդ Քուշները։

Թարգմանությունը՝ Էմմա Չոբանյանի