ԵՄ-ն ՀՀ-ում «Հիբրիդային արագ արձագանքման խումբ» կտեղակայի` ընտրություններում ՌԴ ապատեղեկատվության դեմ պայքարելու․ «Ազատություն»

Եվրամիությունը պատրաստվում է օգնել Հայաստանին հակազդելու Ռուսաստանի միջամտությանը հունիսին նախատեսված խորհրդարանական ընտրություններին՝ նախ տեղակայելով «Հիբրիդային արագ արձագանքման խումբ» Կրեմլի ապատեղեկատվության դեմ պայքարելու համար, ապա, հնարավոր է,  մշտական ​​քաղաքացիական առաքելության տեղակայում։

«Ազատություն» ռադիոկայանի տրամադրության տակ եղած նամակի համաձայն՝ Հայաստանի արտաքին գործերի նախարար Արարատ Միրզոյանը փետրվարի 13-ին Բրյուսելից խնդրել է արագ արձագանքման խումբ ուղարկել Երևան։

ԵՄ-ն նմանատիպ խումբ է ուղարկել Մոլդովա անցյալ տարի խորհրդարանական ընտրությունների ժամանակ, որը բաղկացած էր մոտ 20 մարդուց, որոնք Մոլդովայի իշխանությունների հետ համատեղ աշխատել էին ժամանակին հայտնաբերելու և հակազդելու Ռուսաստանից սոցիալական ցանցերում տարածվող ապատեղեկատվությանը։

Ե՛վ Բրյուսելը, և՛ Քիշնևը նախագիծը հաջողված են  համարում, և Եվրամիությունն այժմ ցանկանում է կրկնել նույն ջանքերը նաև Հայաստանում, քանի որ երկիրը կանգնած է կարևորագույն ընտրությունների առջև, որոնց վրա, ինչպես սպասվում է, Ռուսաստանը կփորձի ազդել։

Բրյուսելում քննարկումներից ստացված դիվանագիտական ​​​​նոտաների համաձայն` ԵՄ-ն ցանկանում է «արտահայտել աջակցություն Հայաստանի ժողովրդավարական դիմադրողականության և տեղեկատվական ամբողջականության ամրապնդմանը, ինչպես 2026 թվականի հունիսի ընտրություններից առաջ, այնպես էլ՝ Հայաստանի և Ադրբեջանի միջև ընթացող խաղաղության գործընթացի ընթացքում»։

Նշվում է, որ «Հայաստանին առաջարկվող աջակցությունը պետք է հստակ ուղղված լինի Ռուսաստանի անկայունացնող գործունեության նվազեցմանը և մեղմացմանը»։

Կա նաև խնդրանք ԵՄ դիվանագիտական ​​կորպուսին՝ EEAS-ին, «շարունակել իր կապը Ադրբեջանի հետ՝ բացատրելու ԵՄ-ի կողմից Հայաստանին ցուցաբերվող աջակցության նպատակը և ընթացիկ խաղաղության գործընթացին բացասական ազդեցությունից խուսափելու անհրաժեշտությունը»։

Բաքուն նախկինում մտահոգություններ էր հայտնել ինչպես վերջին տարիներին ԵՄ-ի կողմից Հայաստանին տրամադրվող ոչ մահացու ռազմական օգնության, այնպես էլ՝ Հայաստանում ԵՄ ներկայիս առաքելության՝ EUMA-ի վերաբերյալ։

Նոր առաքելությունն ավելի շատ կկենտրոնանա հիբրիդային սպառնալիքների վրա, իսկ դիվանագիտական ​​​​նոտայում դրա դերը նկարագրվում է որպես «ընտրական գործընթացի ամբողջականության պաշտպանություն, որին հնարավոր է՝ անմիջապես հաջորդի սահմանադրական հանրաքվեն»։

ԵՄ մի շարք դիվանագետների խոսքով՝ գաղափարն այն է, որ առաքելությունը ստեղծվի և գործի մինչև մայիսի 4-ին Երևանում կայանալիք ԵՄ-Հայաստան գագաթնաժողովը։ Սա նշանակում է, որ մարտ ամսվա ընթացքում պետք է որոշում կայացվի։

Նշվում է, որ Երևանը նման առաքելության համար դիմել է արդեն 2025 թվականի դեկտեմբերին, սակայն դրա մեկնարկը լիովին պարզ չէ։

ԵՄ անդամ պետություններին անհրաժեշտ է երկու որոշում՝ մեկը՝ այն տեխնիկապես հաստատելու և մյուսը՝ իրականում մեկնարկելու համար։ Եվ չնայած ոչ ոք դեռևս որևէ մտահոգություն չի հայտնել, դիվանագետները,նշում են, որ Հայաստանը չունի նույն եվրոպական և միջազգային աջակցությունը, ինչ Մոլդովան, որը պաշտոնական թեկնածու երկիր է, որը ձգտում է միանալ դաշինքին արդեն այս տասնամյակում։

Հունգարիան նախկինում արգելափակել է ԵՄ-ի կողմից Երևանին աջակցելու վերաբերյալ որոշումները՝ հաճախ պնդելով, որ Ադրբեջանին պետք է տրվի այն ամենը, ինչ Հայաստանին տրամադրվում է։

ԵՄ կուլիսներում նաև հույս կա, որ Ադրբեջանը կարող է ավելի դրականորեն տրամադրված լինել Հայաստանում նոր առաքելության նկատմամբ, քանի որ դա կապված կլինի ԱՄՆ-ի գլխավորած խաղաղության գործընթացին աջակցելու և առաջին հերթին Հայաստանի ու Ադրբեջանի միջև հարաբերությունների կարգավորման հետ, և հնարավոր է՝ նույնիսկ ապահովի Հայաստանի և Թուրքիայի միջև ավելի լավ հարաբերություններ ապագայում։

Թարգմանությունը` Էմմա Չոբանյանի