Քաղաքականություն
24.02.2026 | 16:52
«Ադրբեջանի ԱԳ նախարար Ջեյհուն Բայրամովի հետ քննարկել ենք Ադրբեջանի և Հայաստանի միջև խաղաղության գործընթացը»,- այս մասին Բաքվում լրագրողների հետ զրույցում հայտարարել է Թուրքիայի Ազգային Մեծ ժողովի արտաքին հարաբերությունների հանձնաժողովի նախագահ Ֆուաթ Օքթայը, գրում են ադրբեջանական լրատվամիջոցները։
Նա նշել է, որ ուրախ է իմանալ, որ կարգավորման գործընթացի շրջանակներում բոլոր աշխատանքները դրական են ընթանում։
«Մենք նաև քննարկեցինք Թուրքիայի, Ադրբեջանի և Վրաստանի միջև եռակողմ համագործակցության ձևաչափը։ Հանդիպման ընթացքում մենք հնարավորություն ունեցանք անդրադառնալու բոլոր տարածաշրջանային հարցերին և երկկողմ հարաբերություններին։ Մենք մանրամասն քննարկեցինք ինչպես եռակողմ համագործակցության ձևաչափը, այնպես էլ Ադրբեջանի և Հայաստանի միջև խաղաղության բանակցությունները։ Եվս մեկ անգամ համոզվեցինք, որ խաղաղության գործընթացի շուրջ բոլոր աշխատանքներն ու բանակցությունները ընթանում են դրական ուղղությամբ, ինչից ես չափազանց գոհ եմ»,- ասել է Օքթայը։
Նա նշել է նաև Բաքու-Թբիլիսի-Կարս և Բաքու-Թբիլիսի-Ջեյհան նախագծերի առաջընթացի լավ տեմպը։
«Այսօր մենք կրկին ուրախ ենք նշել, որ Ադրբեջանը առաջատար դիրք է զբաղեցնում նավթի և գազի խողովակաշարերի միջոցով արտահանման և տեղափոխման ոլորտում: Այն հողերը, որոնց վրա մենք ապրում ենք, չափազանց հարուստ են ինչպես բնական պաշարներով, այնպես էլ մարդկային կապիտալով: Հետևաբար, մենք որոշակի պատասխանատվություն ենք կրում», – ասել է թուրք պատգամավորը։
Օքթայը ընդգծել է, որ Թուրքիայի, Ադրբեջանի և Վրաստանի միջև հարաբերությունները հատկապես ամուր են այսօր և զգալի ներուժ ունեն ապագայի համար. «Կարճ ժամանակ անց ես կհանդիպեմ Միլլի Մեջլիսի խոսնակի հետ, որից հետո կկայանա եռակողմ հանդիպում Ադրբեջանի, Թուրքիայի և Վրաստանի միջև»։
Թարգմանությունը՝ Էմմա Չոբանյանի
