03.07.2026 | 05:09
ԱԱ-2026. Պորտուգալիան հաղթանակ կորզեց ու կխաղա Իսպանիայի հետ. ՏԵՍԱՆՅՈՒԹ
Կարեն Ղազարյանին Բաքվի կողմից դատական գործընթացում ներգրավելը մարդասիրական իրավունքի կոպտագույն խախտում է. ԱԳՆ
Քաղաքականություն
13.11.2018 | 12:28
Ի սկզբանե հստակ էր, որ Ադրբեջանի իշխանությունները փորձելու են անհայտ պայմաններում ադրբեջանական տարածքում հայտնված ՀՀ քաղաքացի Կարեն Ղազարյանի ներգրավմամբ բեմականացում իրականացնել՝ տեսախցիկների առջև նրան իբրև դիվերսանտի ներկայացնելով: Այս մասին այսօր՝ նոյեմբերի 13-ին, տեղի ունեցած ճեպազրույցում հայտարարեց ՀՀ ԱԳՆ խոսնակ Աննա Նաղդալյանը:
«Բայց իրենց այս առաջնային սցենարը տապալվեց, քանի որ Կարեն Ղազարյանն ուներ հոգեկան խնդիրներ և պարտադիր զինվորական ծառայության չէր զորակոչվել: Հայաստանը Կարեն Ղազարյանի առողջական վիճակի հետ կապված բոլոր ապացուցները միջազգային կազմակերպությունների միջոցով փոխանցել է, որոնք ակնհայտորեն անտեսվել են ադրբեջանական իշխանությունների կողմից»,- նշեց Աննա Նաղդալյանը:
Ըստ ԱԳՆ խոսնակի՝ դատական գործընթաց բեմականացնելով՝ Ադրբեջանը փորձում է ծանր մեղադրանքով գործում ներգրավել ակնհայտ առողջական խնդիրներ ունեցող մարդու, որը միջազգային մարդասիրական իրավունքի կոպտագույն խախտում է:
«Այս ամբողջ ֆարսը հետապնդում է միայն մեկ նպատակ. այս անմեղ մարդուն ներկայացնել որպես հանցագործ և որոշակիորեն հավասարության նշան դնել նրա և ծանր հանցագործություն իրականացրած ադրբեջանցի դիվերսանտների միջև»,- ընդգծեց Նաղդալյանը՝ հիշեցնելով, որ 2015 թվականին Արցախի դատարանի կողմից դատապարտվել է երկու ադրբեջանցի, որոնք մեղադրվում են սահմանն անօրինական հատելու, զենք կրելու, ատելության հողի վրա անչափահասի նկատմամբ զենքի գործադրմամբ բռնություն կիրառելու, իսկ նրանցից մեկն էլ՝ ևս երկուսի նկատմամբ սպանության փորձ կատարելու մեջ:
«Հայաստանի ԱԳՆ-ն համապատասխան աշխատանքներ է տանում, և մեր օրակարգում շարունակում է մնալ մեր հայրենակցին հայրենիք վերադարձնելու հարցը»,- եզրափակեց Աննա Նաղդալյանը:
