28.10.2026 | 10:44
Իսրայելի ընտրություններում Նեթանյահուն և նրա գլխավոր մրցակիցը մեծամասնություն չեն ստանում
Ժնևում վերսկսվել են ՌԴ-ի, Ուկրաինայի և ԱՄՆ-ի միջև եռակողմ բանակցությունները
Քաղաքականություն
18.02.2026 | 13:12
Ժնևում վերսկսվել են Ռուսաստանի, Ուկրաինայի և ԱՄՆ-ի պատվիրակությունների մասնակցությամբ եռակողմ բանակցությունները, հաղորդում են ՌԻԱ Նովոստին և ՏԱՍՍ-ը՝ հղում անելով աղբյուրներին, գրում է Meduza-ն։
Բանակցությունները, ինչպես փետրվարի 17-ին, անցկացվում են փակ դռների հետևում։ Դրանց վերսկսման մասին հայտարարել է նաև Ուկրաինայի պատվիրակության ղեկավար Ռուստեմ Ումերովը։
Axios-ը հայտնել էր, որ փետրվարի 17-ին եռակողմ բանակցությունների ժամանակ քաղաքական խումբը «հասել է փակուղու», մինչդեռ ռազմական խումբը «շարունակել է առաջընթաց գրանցել»։ Նշվում է, որ դա պայմանավորված է եղել ռուսական բանակցային թիմի ղեկավար Վլադիմիր Մեդինսկիի արտահայտած դիրքորոշմամբ։
Մի աղբյուր հայտնել է, որ ռուսական կողմի ներկայացուցիչները բողոքել են Ուկրաինայի նախագահ Վլադիմիր Զելենսկիի վերջին հրապարակային հայտարարություններից։ Նրանք կարծում են, որ Զելենսկին լուրջ բանակցություններ չի վարում, այլ «փորձում է բարձրացնել իր ժողովրդականությունը երկրում՝ հնարավոր ընտրություններից առաջ»։
ՌԲԿ-ի աղբյուրը բանակցությունների առաջին օրը բնութագրել էր որպես «շատ լարված»։ Ըստ նրա՝ քննարկումները տեղի են ունեցել ինչպես երկկողմ, այնպես էլ եռակողմ ձևաչափերով։
Թարգմանությունը՝ Էմմա Չոբանյանի
