Ուիթկոֆը հայտարարել է, որ Ուկրաինայում պատերազմի հարցով բանակցություններում «նշանակալի առաջընթաց» է գրանցվել

ԱՄՆ նախագահի հատուկ բանագնաց Սթիվ Ուիթկոֆը հայտարարել է, որ Ուկրաինայի և Ռուսաստանի միջև բանակցությունները «նշանակալի առաջընթաց են գրանցել» Ուկրաինայում պատերազմը դադարեցնելու՝ Վաշինգտոնի գլխավորած ջանքերում, գրում է Le Monde-ը։

«Նախագահ Թրամփի հաջողությունն այս պատերազմի երկու կողմերին միավորելու գործում նշանակալի առաջընթաց է ապահովել, և մենք հպարտ ենք նրա առաջնորդությամբ աշխատել՝ այս սարսափելի հակամարտության ընթացքում սպանությունները դադարեցնելու համար: Երկու կողմերն էլ համաձայնել են տեղեկացնել իրենց համապատասխան առաջնորդներին և շարունակել աշխատել գործարքի հասնելու ուղղությամբ»,- գրել է նա X-ում։

Ուկրաինայի նախագահ Վլադիմիր Զելենսկին իր երեկոյան ելույթում ասել է, որ պատրաստ է «արագ շարժվել դեպի պատերազմը դադարեցնելու արժանի համաձայնագիր», սակայն կասկածի տակ է դրել՝ արդյո՞ք Ռուսաստանը լուրջ է վերաբերվում խաղաղությանը։ Զելենսկին Մոսկվային մեղադրել է «իրական դիվանագիտության» փոխարեն հրթիռային հարվածներին առաջնահերթություն տալու մեջ։

Ժնևի բանակցությունների համար Կրեմլը վերականգնել է նախկին մշակույթի նախարար Վլադիմիր Մեդինսկիի գլխավոր բանակցողի պաշտոնը։ Ուկրաինայի ազգային անվտանգության քարտուղար Ռուստեմ Ումերովն էլ գլխավորել է ուկրաինական պատվիրակությունը և հայտարարել, որ բանակցությունները կշարունակվեն չորեքշաբթի։

Նա շնորհակալություն է հայտնել Վաշինգտոնին միջնորդության համար՝ ասելով, որ եվրոպացի դաշնակիցներին տեղեկացրել է բանակցությունների առաջին փուլի արդյունքների մասին, որոնք, նրա խոսքով, կենտրոնացած էին հակամարտության «գործնական հարցերի և հնարավոր լուծումների մեխանիզմների» վրա։

«Ես առանձին հանդիպում եմ անցկացրել Միացյալ Նահանգների ու եվրոպական գործընկերների՝ Ֆրանսիայի, Մեծ Բրիտանիայի, Գերմանիայի, Իտալիայի և Շվեյցարիայի ներկայացուցիչների հետ։ Մենք քննարկել ենք այսօրվա բանակցությունների փուլի արդյունքները և համաձայնեցրել մեր մոտեցումները հետագա քայլերի վերաբերյալ»,- գրել է նա  տելեգրամում։

Թարգմանությունը՝ Էմմա Չոբանյանի