Իրանում կրկին հակակառավարական ակցիաներ են տեղի ունեցել

Իրանում փետրվարի 17-ին հարգանքի տուրք են մատուցել դաժանորեն ճնշված բողոքի ցույցերի ժամանակ զոհվածների հիշատակին: Մի քանի քաղաքներում հիշատակի միջոցառումներ են անցկացվել, որոնց ընթացքում Իրանի անվտանգության ուժերի հետ նոր բախումներ են գրանցվել, հայտնում է AFP-ն:

Աբադանում մարդիկ ձեռքերին ծաղիկներով և զոհերի լուսանկարներով վանկարկել են՝ «Մա՛հ Խամենեիին» և «Կեցցե՛ շահը»: AFP-ի փոխանցմամբ՝ Աբադանից ստացված տեսանյութերից մեկում երևում է, թե ինչպես են մարդիկ խուճապահար փախչում կրակոցների տակ:

Մաշհադում էլ ամբոխը վանկարկել է՝ «Մեկ մարդ սպանվել է, հազարավորները կանգնած են նրա կողքին», գրում է DW-ի ռուսական ծառայությունը։

Իրանի իշխանությունները, իրենց հերթին, Թեհրանի Իմամ Խոմեյնիի մզկիթում կազմակերպել են պաշտոնական արարողություն՝ նվիրված բողոքի ցույցերի զոհերի հիշատակին: Մասնակիցները ծածանել են իրանական դրոշներ և վանկարկել «Մա՛հ Ամերիկային», «Մա՛հ Իսրայելին» կարգախոսներ:

Միջոցառմանը ելույթ են ունեցել բարձրաստիճան պաշտոնյաներ, այդ թվում՝ Իրանի փոխնախագահ Մոհամմադ Ռեզա Արեֆը և Իսլամական հեղափոխության պահապանների կորպուսի (ԻՀՊԿ) հրամանատար Էսմայիլ Քաանին:

«Անկարգությունները հրահրողներին և ահաբեկիչներին աջակցողները հանցագործներ են և կբախվեն հետևանքների»,- հայտարարել է Քաանին։

Իրանում առաջին բողոքի ցույցերը, որոնք սկսվել էին 2025 թվականի դեկտեմբերին, տնտեսական պատճառներով էին: Սակայն շուտով դրանք ստացան քաղաքական բնույթ և տարածվեցին ամբողջ երկրում: Իշխանությունները փորձեցին դրանք բռնությամբ ճնշել: Ականատեսները և մարդու իրավունքների պաշտպանությամբ զբաղվող կազմակերպությունները հաղորդել են, որ Իրանի անվտանգության ուժերը կրակ են բացել ցուցարարների վրա ամբողջ երկրում: Կառավարությունն արգելափակել էր ինտերնետը և բջջային հեռախոսակապի ծառայությունները:

Իրանի արտաքին գործերի նախարար Աբբաս Արաղչին հունվարի 23-ին հայտարարել է, որ բողոքի ցույցերի ժամանակ զոհվածների թիվը հասել է 3,117-ի: Նրանցից 2,427-ը քաղաքացիական անձինք և անվտանգության աշխատակիցներ են: Նախարարը մնացած զոհերին անվանել էր «ահաբեկիչներ»:

Անկախ իրավապաշտպան կազմակերպությունները տարբեր գնահատականներ են տալիս: ԱՄՆ-ում գործող Human Rights Activists News Agency (HRANA) հաղորդում է, որ զոհվել է ավելի քան 7,000 մարդ, որոնց մեծ մասը ցուցարարներ են:

Թարգմանությունը՝ Էմմա Չոբանյանի