07.09.2026 | 15:32
Աղիքային վարակի գանգատներով 3 անձ Բյուրեղավանից հոսպիտալացվել է «Աբովյան» ԲԿ-ում
Իրանում ցուցարարների նկատմամբ առնվազն 23,000 քրեական գործ է հարուցվել
Քաղաքականություն
17.02.2026 | 23:06
Իրանում ցուցարարների նկատմամբ հարուցվել է առնվազն 23,000 քրեական գործ, հաղորդում է Radio Farda-ն՝ հղում անելով դատական պաշտոնյայի, գրում է Current time-ը։
Ըստ աղբյուրի՝ ձերբակալություններ են իրականացվել երկրի բոլոր նահանգներում։ Նա նաև ասել է, որ բողոքի ցույցերի ընթացքում գրանցվել են 749 ոստիկանական բաժանմունքների և Իսլամական հեղափոխության պահապանների կորպուսի 120 կենտրոնների վրա հարձակումներ։
ԱՄՆ-ում գործող «Իրանի մարդու իրավունքների պաշտպաններ» (HRAI) անկախ իրավապաշտպան կազմակերպության տվյալներով՝ փետրվարի 15-ի դրությամբ՝ ձերբակալվել էր առնվազն 53,552 մարդ, որոնցից 144-ը՝ ուսանողներ։ 11,053 մարդ կանչվել է դատարան։
Իրանում բողոքի ցույցերը սկսվել էին 2025 թվականի դեկտեմբերի 28-ին և տարածվել երկրի բոլոր նահանգներում: Սկզբում ցուցարարները բարձրացնում էին տնտեսական ճգնաժամի հետ կապված պահանջներ, սակայն ավելի ուշ սկսեցին կարգախոսներ վանկարկել կառավարության դեմ, նաև միապետության վերականգնման կոչեր հնչեցին։
HRAI-ը հաղորդում է, որ հաստատվել է 7015 մարդու մահ, որոնցից 6508-ը համարվում են ցուցարարներ։ Եվս 11,744 դեպք քննվում է: Բացի այդ, ըստ մարդու իրավունքների պաշտպանների՝ 25,845 մարդ վիրավորվել է:
The Wall Street Journal-ը, հղում անելով ԱՄՆ պաշտոնյաներին, հաղորդել էր, որ ԱՄՆ-ը գաղտնի կերպով շուրջ 6000 Starlink տերմինալ է ուղարկել Իրան՝ քաղաքացիներին օգնելու շրջանցել արգելափակումների ռեժիմը։
Նշվում է, որ նախագահ Թրամփը տեղյակ է եղել մատակարարումների մասին, բայց հայտնի չէ՝ արդյո՞ք նա անմիջականորեն հաստատել է այդ ծրագիրը։
Թարգմանությունը՝ Էմմա Չոբանյանի
