Հայտնի է, թե ով է ղեկավարելու ԲՀԿ նախընտրական շտաբը. Ծառուկյանը կուսակիցներին չի՞ վստահում

«Բարգավաճ Հայաստան» կուսակցության նախնտրական շտաբը ղեկավարելու է ԲՀԿ առաջնորդ Գագիկ Ծառուկյանը: Այս տեղեկությունները Factor.am-ին փոխանցեցին ԲՀԿ աղբյուրները: Տեղեկության վերաբերյալ զրուցեցինք ԲՀԿ փոխնախագահ Միքայել Մելքումյանի հետ: Նա նշեց, որ շտաբի պետը որոշված է, բայց այս պահին չեն հայտարարելու, թե ով է: Նշենք, որ Գագիկ Ծառուկյանը որեւէ անգամ նախընտրական շրջանում շտաբի ղեկավարման պարտականությունն իր վրա չի վերցրել, այս գործը վստահել է կուսակիցներին: Մասնավորապես, 2017-ի ընտրությունների ժամանակ կուսակցության շտաբի ղեկավարը եղել է Իշխան Զաքարյանը: Այս անգամ ինքնուրույն շտաբի աշխատանքը ղեկավարելու որոշումը, թերեւս, պայմանավորված է ԲՀԿ-ում առկա իրավիճակով․ բոլորը սկսել են միմյանց վրա «բոչկա» գլորել՝ Ծառուկյանի մոտ միավորներ հավաքելու եւ Երեւանի ավագանու ընտրությունների ձախողումը իրենցից հեռու պահելու համար։

Ի դեպ, Ծառուկյանը,ով գլխավորելու է ԲՀԿ ցուցակը,նաեւ միանձնյա որոշում է, թե ով ԲՀԿ համամասնական ցուցակի որ տեղում է լինելու:

Factor.am-ը գրել էր, որ թիվ 1 ընտրատարածքից՝ Երևանի Ավան, Նոր Նորք, Քանաքեռ-Զեյթուն վարչական շրջաններից առաջադրվելու է պատգամավոր Գևորգ Պետրոսյանը:

Թիվ 4 ընտրատարածքում՝ Կենտրոն, Նորք-Մարաշ, Էրեբունի, Նուբարաշեն վարչական շրջաններում առաջադրվելու են Վահե Էնֆիաջյանն ու Միքայել Մելքումյանը: Թիվ 2 ընտրատարածքում՝ Արաբկիր, Աջափնյակ, Դավթաշեն վարչական շրջաններում առաջադրվելու է Տիգրան Ուրիխանյանը: Լոռու մարզում առաջադրվելու է պատգամավոր Վանիկ Ասատրյանը:

Շիրակի մարզում էլ ԲՀԿ-ն ներկայացնելու են Վարդևան Գրիգորյանն ու Վարդան Ղուկասյանը: Վայոց ձորի և Սյունիքի մարզերում, որը թիվ 12 ընտրատարածքն է, առաջադրվելու են Նաիրա Զոհրաբյանն ու Սերգեյ Բագրատյանը: Զոհրաբյանն աշխատելու է Սյունիքում, իսկ Բագրատյանը՝ Վայոց ձորում: Արմավիրի մարզում էլ ԲՀԿ-ի հույսը Արայիկ Աղաբաբյանն է

ԲՀԿ ցուցակում թարմ դեմքեր լինելու են Երևանի ավագանու անդամ Արման Աբովյանը, տրանսպորտի նախարար Արմեն Արզումյանը և «Միասնություն» շարժման ղեկավար Արման Վարդանյանը: ԲՀԿ համամասնական ցուցակը բաղկացած է լինելու 200 թեկնածուից:

Հայկ Վարդանյան