24.02.2026 | 23:39
Հայաստանի մի շարք հասցեներում էլեկտրաէներգիայի անջատումներ կլինեն
Թող ների ինձ պարոն Սարգսյանը, բայց ՀՀԿ-ն անցողիկ շեմը չի հաղթահարի. Գևորգ Գորգիսյան
Քաղաքականություն
12.11.2018 | 15:35
Հանրապետականը երանելի ընդդիմություն կարող է լինել ցանկացած իշխանության համար. իրենք հասարակության շրջանում չունեն վարկանիշ: Factor.am-ի հետ զրույցում արձագանքելով ՀՀԿ փոխնախագահ, ընտրություններում կուսակցության համամասնական ցուցակը գլխավորող Վիգեն Սարգսյանի ՝ երեկ արած հայտարարություններին, նշեց «Լուսավոր Հայաստան» կուսակցության անդամ, ԱԺ «Ելք» խմբակցության քարտուղար Գևորգ Գորգիսյանը:
Վիգեն Սարգսյանը երեկ կուսակցության խորհրդի նիստից հետո լրագրողների հետ զրույցում հայտարարել էր, որ իրենք առաջիկա ընտրությունների արդյունքում հավակնում են դառնալ խորհրդարանում մեծությամբ երկրորդ քաղաքական ուժը և այսօր իրենք են իրական ընդդիմություն:
«Նրանք դիտվելու են որպես նեղացած ուժ, որը փորձելու է անհիմն ցեխ շպրտել իշխանությունների վրա: Եվ դա որևէ կերպ չի փոխզսպելու իշխանություններին: Բացի այդ, ես չեմ կարծում, որ Հանրապետականն ունի այն վարկանիշը, որ քաղաքացիները գնան և ընտրեն Հանրապետական կուսակցությանը, որպեսզի նրանք անցնեն խորհրդարան»,- մեզ հետ զրույցում շեշտեց Գևորգ Գորգիսյանը՝ հավելելով. «Թող ների ինձ պարոն Սարգսյանը, բայց ես նրանց առաջիկա խորհրդարանում չեմ տեսնում»:
Գորգիսյանը ընդգծեց, որ հասարակությունը դեռևս չի մոռացել Հանրապետականի պաշտոնավարման ընթացքում նրանց ունեցած թերացումները: «Արժի, որ իրենք դուրս գան, շփվեն հասարակության հետ և կհասկանան, թե մարդիկ ինչու իրենց չեն սիրում, որոնք են իրենց թերացումները և ինչու երկիրը հասավ այս օրին»,- շարունակեց պատգամավորը՝ պնդելով, որ ՀՀԿ-ն այս ընտրություններին չի հաղթահարի անցողիկ շեմը:
Մեր հարցին՝ քաղաքական ուժերի հայտարարություններից ստացվո՞ւմ է, որ առաջիկա ընտրություններին պայքար է ընթալու ոչ թե իշխանության, այլ ընդդիմադիր դաշտում դիրքավորվելու համար, այս պարագայում Հանրապետակա՞նն է լինելու իրենց մրցակիցը, Գորգիսյանը նկատեց՝ թեև իրենք ՀՀԿ-ին առաջիկա խորհրդարանում չեն տեսնում, բայց հարգանքով են վերաբերում ցանկացած քաղաքական ուժի և մաղթում հաջողություն:
«Քաղաքացիներն իրենց ընտրությունը կատարելիս պետք է հաշվի առնեն ուժերի անցած ճանապարհը, եթե հեղափոխությունը եղել է ռեժիմի դեմ, ապա երբևէ ռեժիմի մաս կազմած որևէ քաղաքական ուժ չպետք է լինի խորհրդարանում»,- նշեց Գորգիսյանը՝ նկատելով․ «Ես կանհանգստանամ, որ մեր քաղաքացիների մեջ այս ամենից հետո գտնվեն մարդիկ, որոնք կվստահեն Հանրապետականին»:
Շողիկ Գալստյան
