24.02.2026 | 23:39
Հայաստանի մի շարք հասցեներում էլեկտրաէներգիայի անջատումներ կլինեն
Չեմ սիրում քաղաքականության մեջ առաջնորդվել կոֆեի բաժակի մրուրով. Նաիրա Զոհրաբյան. ՏԵՍԱՆՅՈՒԹ
Քաղաքականություն
12.11.2018 | 12:10
Ես ընդհանրապես չեմ սիրում քաղաքականության մեջ առաջնորդվել կոֆեի բաժակի մրուրով, թե կոֆեի բաժակի հետագիծն ինչ ցույց կտա, քաղաքականությունն ինձ համար առաջին հերթին ազնվություն է: Այս մասին այսօր՝ նոյեմբերի 12-ին, ՀՀ Ազգային ժողովում լրագրողների հետ զրույցում ասաց «Ծառուկյան» խմբակցության պատգամավոր Նաիրա Զոհրաբյանը:
«Քաղաքականությունը, ինչքան էլ շատերը տարբեր եզրույթներով այն համեմատում են տարբեր արվեստների հետ, ինձ համար առաջինն ազնվություն է: Քաղաքական գործիչը պետք է ասի այն, ինչ մտածում է, ոչ թե մտածի մեկ բան, ասի մեկ այլ բան»,- ասաց Զոհրաբյանը:
Պատգամավորը վստահեցնում է, որ «Բարգավաճ Հայաստան» կուսակցությունը գնում է արդար մրցապայքարի, ընդ որում՝ բավական ուժեղ ծրագրով: «Մեր զրուցակիցը լինելու է ՀՀ քաղաքացին: Մենք գնում ենք նրան ներկայացնելու մեր, իմ վստահ համոզմամբ, բավականին ուժեղ նախընտրական ծրագիրը, որն առաջիկայում կներկայացվի հանրությանը, և որտեղ քաղաքացին հստակ տեսնելու է, որ այս ծրագրի իրագործումը բերելու է լուրջ տնտեսական բարեփոխումների»,- հավելեց նա:
Նրա խոսքով՝ իրենք չեն գնում որևէ մեկին վիրավորելու, մեկ այլ քաղաքական ուժի հաշվին քաղաքական դիվիդենտներ շահելու. «Մենք քաղաքական կոռեկտության կոչ ենք անում բոլորին: Ով կխախտի ընտրապայքարի ընթացքում քաղաքական կոռեկտությունը, համարժեք պատասխան կստանա»:
Ինչ վերաբերում է ռեյտինգային ընտրակարգով Սյունիքում առաջադրվելուն. Նաիրա Զոհրաբյանը հերքում է տեսակետները, թե իրեն «աքսորել» են:
«Կարծում եմ՝ կայացած քաղաքական գործիչը պետք է վստահության քվե ունենա ոչ միայն այն բակում, որտեղ ծնվել և մեծացել է, այլև հանրապետության ցանկացած բնակավայրում, մարզում, շրջանում, որտեղ կորոշի իր կուսակցությունը: Բացի այդ՝ իմ արմատները Սյունիքից են, ինձ համար այդ արմատները շատ թանկ ու սիրելի են»,- հայտարարեց Նաիրա Զոհրաբյանը:
Մանրամասները՝ տեսանյութում:
