Քաղաքականություն
10.02.2026 | 11:55
Եվրամիությունը նախատեսում է առաջին անգամ սահմանափակումներ մտցնել երրորդ երկրների նավահանգիստների՝ Վրաստանի Կուլևիի և Ինդոնեզիայի Քարիմունի նավահանգիստների նկատմամբ՝ որպես Ռուսաստանի դեմ պատժամիջոցների մաս: Հնարավոր պատժամիջոցները բխում են ռուսական նավթի հետ կապված գործարքներից, հաղորդում է Reuters-ը՝ հղում անելով Եվրահանձնաժողովի և Եվրոպական արտաքին գործողությունների ծառայության կողմից պատրաստված փաստաթղթին, գրում է DW-ի ռուսական ծառայությունը։
Սահմանափակումները կարող են ներառվել Ռուսաստանի դեմ ԵՄ 20-րդ պատժամիջոցների փաթեթում, որը նախատեսվում է ընդունել մինչև փետրվարի 24-ը՝ Ռուսաստանի կողմից Ուկրաինա լայնածավալ ներխուժման չորրորդ տարելիցը: Ընդունվելու դեպքում ԵՄ ընկերություններին և անհատներին կարգելվի համագործակցել այդ նավահանգիստների հետ:
Բացի այդ, ԵՄ պատժամիջոցների են ենթարկվելու նաև ղրղզական Keremet և «Կապիտալ Բանկ Կենտրոնական Ասիա» բանկերը, ինչպես նաև Լաոսի և Տաջիկստանի ֆինանսական հաստատությունները։ Սակայն նախատեսվում է վերացնել սահմանափակումները երկու չինական բանկերի համար։
ԵՄ-ն նաև մտադիր է արգելել մետաղահատ մեքենաների և կապի սարքավորումների ներմուծումը Ղրղզստան։
Նոր փաթեթի շրջանակում քննարկվում է ևս 30 անհատների և 64 ռուսական ընկերությունների, այդ թվում՝ «Բաշնեֆտի» և ութ ռուսական նավթավերամշակման գործարանների նկատմամբ պատժամիջոցների սահմանումը։ Փետրվարի 6-ին, երբ ներկայացվեց պատժամիջոցների 20-րդ փաթեթը, Եվրոպական հանձնաժողովի նախագահ Ուրսուլա ֆոն դեր Լեյենը նույնպես հայտարարեց ռուսական նավթ տեղափոխող «ստվերային նավատորմի» մաս կազմող 43 լցանավերի նկատմամբ սահմանափակումների մասին։
Բացի այդ, ըստ ֆոն դեր Լեյենի՝ առաջարկվում է ռուսական հում նավթի ծովային փոխադրումների լիակատար արգելք: Քննարկվում է նաև մետաղների՝ նիկելի, երկաթի հանքաքարի, պղնձի և ալյումինի ներմուծման արգելք: Այլ հնարավոր ներմուծման սահմանափակումներից են ռուսական աղի, ամոնիակի, խճաքարերի, սիլիցիումի և մորթու արգելքը:
Նոր փաթեթը կհաստատվի միայն ԵՄ բոլոր անդամ պետությունների համաձայնությամբ:
Թարգմանությունը՝ Էմմա Չոբանյանի
