06.10.2026 | 00:38
Ազգերի լիգա. Հայաստանի հավաքականը ոչ-ոքի խաղաց Չեռնոգորիայի հետ
Հայաստանն ԱՄՆ-ից ձեռք է բերել V-BAT տեսակի անօդաչու թռչող սարքեր․ Փաշինյան. ՏԵՍԱՆՅՈՒԹ
Քաղաքականություն
09.02.2026 | 19:44
«Վաշինգտոնի խաղաղության գագաթաժողովով մենք լուրջ զարկ տվեցինք Հայաստան-ԱՄՆ երկկողմ հարաբերություններին, ինչպես նաև նախագահ Թրամփի անձնական ներգրավվածությամբ Հայաստանի և Ադրբեջանի միջև հաստատվեց խաղաղություն»,- այս մասին երկօրյա այցով ՀՀ ժամանած ԱՄՆ փոխնախագահ Ջեյմս Դի Վենսի հետ համատեղ հայտարարության ժամանակ նշեց վարչապետ Նիկոլ Փաշինյանը։
«Վաշինգտոնյան խաղաղության գագաթաժողովից հետո ես և նախագահ Ալիևը, նախագահ Թրամփին համատեղ նամակով առաջադրել ենք խաղաղության Նոբելյան մրցանակի։ Եվ մեծ հույս ունեմ, որ նախագահը արդարացիորեն կարժանանա 2026 թվականի խաղաղության Նոբելյան մրցանակին»,-նշել է նա։
Փաշինյանը Վենսին է ներկայացրել Հարավային Կովկասում ընթացող դրական գործընթացները, ինչպես նաև օրեր առաջ Աբու Դաբիում իր և Ադրբեջանի նախագահի միջև տեղի ունեցած քննարկումների մանրամասները, որոնք ուղղված էին երկրների միջև խաղաղության ամրապնդման հնարավոր նոր քայլերին։
«Այս առիթով վերահաստատել եմ նաև Հայաստանի հանձնառությունը՝ աջակցելու ԱՄՆ կառավարության խաղաղության և խաղաղարար առաքելությանը, այդ թվում խաղաղության խորհրդի գործունեությանը, որի կանոնադրությունը պատիվ եմ ունեցել ստորագրել սույն թվականի հունվարի 22-ին Դավոսում կայացած հանդիսավոր արարողության շրջանակներում։ Ուզում եմ նաև նշել, որ ստացել եմ և սիրով ընդունել եմ նախագահ Թրամփի հրավերը սեպտեմբերի 19-ին մասնակցելու Խաղաղության խորհրդի առաջին նիստին»,-ասել է նա։
Բացի այդ, ՀՀ վարչապետը նշել է, որ օգոստոսի 8-ին Հայաստանի և ԱՄՆ-ի միջև կիսահաղորդիչների և արհեստական բանականությունների ոլորտում կնքած հուշագրի շնորհիվ կյանքի կկոչվի Firebird ընկերության կողմից Հայաստանում արհեստական բանականության գործարան և տվյալների կենտրոն կառուցելու մեգանախագիծը։
«Այս կապակցությամբ պետք է նշել, որ հաստատվել է դեպի Հայաստան NVIDIA ընկերության արտադրած գերհզոր չիպերի հերթական խմբաքանակի արտահանման թույլտվությունների տրամադրումը։ Հուսով եմ, որ բարձր տեխնոլոգիական ոլորտում Հայաստանի և Միացյալ Նահանգների միջև ձևավորված սերտ և թափանցիկ համագործակցությունը թույլ կտա էլ ավելի զարգացնել և ամրապնդել Հայաստանի և Միացյալ Նահանգների ընկերությունների միջև երկուստեք շահավետ փոխգործակցությունը»,-նշել է Փաշինյանը։
Նա նաև հայտնել է, որ Հայաստանն ԱՄՆ-ից ձեռք է բերել V-BAT տեսակի անօդաչու թռչող սարքեր։
Մանրամասները՝ տեսանյութում։
