Իրանը պատրաստ է նոսրացնել հարստացված ուրանը, եթե «բոլոր պատժամիջոցները վերացվեն»

Իրանը պատրաստ է նոսրացնել իր բարձր հարստացված ուրանի մակարդակը, եթե ԱՄՆ-ը վերացնի երկրի նկատմամբ սահմանված բոլոր պատժամիջոցները, հայտարարել է Իրանի ատոմային էներգիայի գործակալության ղեկավարը Վաշինգտոնի հետ անուղղակի բանակցությունների վերսկսումից հետո, գրում է France 24-ը։

«Ուրանի 60 տոկոսով հարստացման հնարավորության վերաբերյալ հարցին ի պատասխան․ Ատոմային էներգիայի գործակալության ղեկավարը նշել է, որ դա կախված է նրանից՝ արդյո՞ք բոլոր պատժամիջոցները կվերացվեն դրա դիմաց», – հաղորդել է իրանական IRNA լրատվական գործակալությունը՝ հղում անելով գործակալության ղեկավար Մոհամմադ Էսլամիին։

Չի նշվում, սակայն, արդյո՞ք պահանջը ներառում է Իրանի նկատմամբ բոլոր պատժամիջոցները, թե՞ միայն ԱՄՆ-ի կողմից սահմանվածները։

Ուրանի նոսրացումը նշանակում է այն ավելացնել խառնուրդի նյութին՝ հարստացման մակարդակը նվազեցնելու համար, որպեսզի վերջնական արդյունքը չգերազանցի հարստացման շեմը։

Մինչև անցյալ տարվա հունիսին ԱՄՆ-ի և Իսրայելի կողմից միջուկային օբյեկտներին հարվածելը՝ Իրանն ուրան էր հարստացրել մինչև 60 տոկոս, ինչը զգալիորեն գերազանցում է 2015 թվականին համաշխարհային տերությունների հետ կնքված և այժմ չգործող միջուկային համաձայնագրով թույլատրված 3,67 տոկոսի սահմանը։

ՄԱԿ-ի միջուկային գործակալության տվյալներով՝ Իրանը միակ ոչ միջուկային զենք ունեցող պետությունն է, որը հարստացնում է ուրանը մինչև 60 տոկոս։

Անհայտ է նաև, թե ո՞ւր է անհետացել պատերազմից առաջ Իրանի ունեցած ավելի քան 400 կիլոգրամ բարձր հարստացված ուրանը. ՄԱԿ-ի տեսուչները վերջին անգամ գրանցել են դրա գտնվելու վայրը հունիսի 10-ին։ Նման պաշարը կարող է թույլ տալ Իրանին ստեղծել ավելի քան ինը միջուկային ռումբ, եթե հարստացումը հասնի 90 տոկոսի։

ԱՄՆ նախագահ Դոնալդ Թրամփը բազմիցս կոչ է արել Իրանին ենթարկվել հարստացման լիակատար արգելքի, ինչը Թեհրանի համար անընդունելի պայման է և շատ ավելի քիչ բարենպաստ, քան 2015 թվականի համաձայնագիրը։

Իրանն էլ պնդում է, որ ունի քաղաքացիական միջուկային ծրագիր՝ համաձայն Միջուկային զենքի չտարածման մասին պայմանագրի դրույթների, որը ստորագրել են Թեհրանն ու ևս 190 երկիր։

Թարգմանությունը՝ Էմմա Չոբանյանի