ՀՀԿ խորհրդի նիստն անցնում է լարված մթնոլորտում. ցուցակներն այսօր չեն հրապարակվելու. ԼՈՒՍԱՆԿԱՐՆԵՐ

Լարված մթնոլորտում արդեն երկու ժամից ավել է շարունակվում է ՀՀԿ խորհրդի նիստը: Քիչ առաջ նիստը լքեց ՀՖՖ նախկին նախագահ, ՀՀԿ խորհրդի անդամ Ռուբեն Հայրապետյանը: Նա չպատասխանեց որևէ հարցի: Մեզ հասած տեղեկություններով՝ լարվածության պատճառը ոչ միայն ցուցակներում տեղերի բաշխումն է, այլև այն, որ չնայած կուսակցության նախագահի հորդորին, որոշ ՀՀԿ-ականներ չեն ցանկանում առաջադրվել ռեյտինգայինով։

Մասնավորապես՝ ՀՀԿ ԳՄ անդամ Վարդան Այվազյանը չի առաջադրվելու որպես ռեյտինգային թեկնածու: Այս մասին Factor.am-ի հարցին ի պատասխան ասաց նա:

Նախկին փոխվարչապետ Վաչե Գաբրիելյանը ևս հայտարարեց, որ ինքը չի մասնակցելու ընտրություններին, բայց եկել է, որ լսի, թե ինչ են ասում: Հարցին՝ ՀՀԿ-ն ձայն կհավաքի՞, Գաբրիելյանն ասաց. «Աստված գիտի»:

Տրանսպորտի, կապի և ՏՏ նախկին նախարար Վահան Մարտիրոսյանն էլ հայտարարեց, որ իր մասնակցությունը նիստի ընթացքում է որոշվելու։

Իսկ ահա էկոնոմիկայի նախկին նախարար Կարեն Ճշմարիտյանը հարցին չպատասխանեց։

Ուշագրավ է, որ ՀՀԿ խորհրդի նիստին մասնակցում է նաև ԱԺ նախագահ Արա Բաբլոյանի որդին՝ Արման Բաբլոյանը: Factor.am-ը դեռևս երկու շաբաթ առաջ գրել էր, որ Բաբլոյանը չի առաջադրվելու, մեր տեղեկությունները հաստատել էին ԱԺ-ի աշխատակազմից: Մի քանի օր առաջ էլ Արա Բաբլոյանը ԱԺ-ում լրագրողների հետ զրույցում նշել էր, որ որդին ևս չի առաջադրվելու:

Մեր տեղեկություններով՝ այսօր ՀՀԿ համամասնական ցուցակը չի հրապարակվելու։ ՀՀԿ-ականները պատրաստվում են ցուցակները հրապարակել նոյեմբերի 14-ին: Այսօր նիստից հետո միայն հայտարարվելու է այն մասին, թե ՀՀԿ-ն ընտրություններին մասնակցելու է, թե՝ ոչ: Այդ մասին հայտարարելու է Վիգեն Սարգսյանը, ով, ի դեպ, քիչ առաջ ընտրվել է ՀՀԿ նախագահի առաջին տեղակալ:

Հայկ Վարդանյան