15.04.2026 | 23:15
Մրգաշենում սպանություն կատարած եղբայրները կալանավորվել են. ՔԿ
Ֆրանսիան պատրաստ է լիակատար աջակցություն ցուցաբերել Հայաստանին COP17-ի կազմակերպման հարցում
Քաղաքականություն
03.02.2026 | 23:21
Մանչեսթեր աշխատանքային այցի շրջանակում Շրջակա միջավայրի նախարար Համբարձում Մաթևոսյանը հանդիպում է ունեցել Ֆրանսիայի շրջակա միջավայրի հարցերով դեսպան Բարբարա Պոմպիլիի հետ։ Այս մասին նախարարն հայտնել է ֆեյսբուքյան գրառման մեջ։
Հանդիպման ընթացքում կողմերը քննարկել են Հայաստանի և Ֆրանսիայի միջև բնապահպանական համագործակցության ընթացիկ օրակարգային հարցերն ու առաջիկա անելիքները։ Զրույցի առանցքում եղել են նաև ՄԱԿ-ի Կենսաբազմազանության մասին կոնվենցիայի Կողմերի 17-րդ համաժողովի (COP17) կազմակերպչական հարցերը։
Բարբարա Պոմպիլին վերահաստատել է, որ Ֆրանսիան պատրաստ է լիակատար աջակցություն ցուցաբերել Հայաստանին՝ COP17-ի բարձր մակարդակով կազմակերպման և նախապատրաստման ուղղությամբ։ Այդ աջակցությունը կներառի կազմակերպչական և տեխնիկական աջակցություն, ինչպես նաև աշխատանք միջազգային գործընկերների հետ բանակցային գործընթացներում։
Հանդիպման ընթացքում անդրադարձ է կատարվել նաև արդեն ձևավորված համագործակցությանը։ Մասնավորապես՝ նշվել են 2016 թվականից Եվրոպական միության կողմից ֆինանսավորվող ծրագրերի շրջանակում Ֆրանսիայի Միջազգային ջրային գրասենյակի հետ իրականացվող աշխատանքները, ինչպես նաև նախարարության համակարգում գործող «Հիդրոօդերևութաբանության և մոնիթորինգի կենտրոն» ՊՈԱԿ-ի համագործակցությունը Météo-France-ի և Météo-France International-ի հետ։
Հանդիպումն ամփոփելով՝ նախարար Համբարձում Մաթևոսյանը վերահաստատել է հայկական կողմի պատրաստակամությունը խորացնելու համագործակցությունը ֆրանսիական կողմի հետ՝ COP17-ի հաջող կազմակերպումը դարձնելով Հայաստանի միջազգային ներգրավվածության և կենսաբազմազանության պաշտպանության օրակարգի առաջխաղացման կարևոր հարթակ։
