«Իզի Փեյ»-ը՝ հեռահաղորդակցության օպերատորների հետ ձևավորված իրավիճակի վերաբերյալ

EasyPay ընկերությունը պաշտոնական հայտարարություն է տարածել՝ կապված հեռահաղորդակցության ընկերությունների հետ համագործակցության դադարեցման շուրջ ծավալվող իրավիճակի հավելյալ պարզաբանման հետ։

««Իզի Փեյ» (EasyPay) ընկերությունը, հավատարիմ մնալով թափանցիկության, պատասխանատվության և հանրային շահի առաջնայնության իր սկզբունքներին, անհրաժեշտ է համարում ներկայացնել իր դիրքորոշումը հեռահաղորդակցության օպերատորների հետ ձևավորված իրավիճակի վերաբերյալ, որն անմիջականորեն առնչվում է հարյուրհազարավոր քաղաքացիների ամենօրյա վճարային հարմարավետությանը։

Վերջին շրջանում «Վիվա Արմենիա», «Թիմ Տելեկոմ» և «Յուքոմ» ընկերությունների կողմից ներկայացված համագործակցության նոր պայմանները, մասնավորապես՝ միջնորդավճարների 40–50 տոկոսանոց կտրուկ կրճատման պահանջը, կրում են միակողմանի բնույթ և չեն համադրվում փոխշահավետ համագործակցության և տնտեսական հիմնավորվածության սկզբունքների հետ։

Միևնույն ժամանակ տեղեկատվական հոսքում նկատվում է մոտեցում, որի համաձայն՝ հեռահաղորդակցության ծառայությունները դիտարկվում են հանրային կարգավորման ներքո գործող կոմունալ ծառայություններին բնորոշ տրամաբանությամբ։ Այս համատեքստում հարկ ենք համարում նշել, որ կոմունալ ծառայությունների սակագները սահմանվում են պետական կարգավորման մեխանիզմներով և գործում են մրցակցային դաշտից դուրս, մինչդեռ հեռահաղորդակցության օպերատորները մասնավոր բիզնես սուբյեկտներ են և գործունեություն են իրականացնում ազատ շուկայական և մրցակցային պայմաններում։

EasyPay-ը ծառայությունների անվտանգությունն ու անխափանությունը ապահովում է շարունակական ներդրումների միջոցով՝ տեխնիկական հուսալիության, կիբերանվտանգության, ինքնասպասարկման տերմինալների սպասարկման, ինչպես նաև թվային և ֆիզիկական ենթակառուցվածքների արդյունավետ կառավարման ուղղություններով։ Նշված գործոնները վճարահաշվարկային ծառայությունների որակի ապահովման օբյեկտիվ բաղադրիչներ են և անմիջական ազդեցություն ունեն ծառայության ինքնարժեքի ձևավորման վրա։ Միաժամանակ վճարահաշվարկային ծառայությունների առանձնահատկությունները, մասնավորապես՝ հեռահաղորդակցության ոլորտում մանրադրամների մուտքագրմամբ ուղեկցվող գործարքների մեծ ծավալը և հետևաբար կանխիկ դրամական միջոցների ինտենսիվ Public շրջանառությունը, պահանջում են գործառնական մեծ ռեսուրսներ, ինչը ևս պետք է հաշվառվի տնտեսական պայմանների ձևավորման ընթացքում։

Առաջարկվող միջնորդավճարների 40–50 տոկոսանոց կրճատումը չի համադրվում գործող ծախսային և գործառնական կառուցվածքի հետ և էական ազդեցություն ունի ծառայությունների կայուն և որակյալ մատուցման հնարավորությունների վրա։ EasyPay-ի կողմից ներկայացված կառուցողական և փոխզիջումային մոտեցումները, ցավոք, չեն ստացել համաձայնություն, ինչի արդյունքում հեռահաղորդակցության օպերատորների կողմից իրականացվել է պայմանագրային հարաբերությունների միակողմանի դադարեցում։

Ստեղծված իրավիճակը կարող է սահմանափակել Հայաստանի տարբեր համայնքներում բնակվող օգտատերերի համար EasyPay-ի ենթակառուցվածքների միջոցով վճարումների հասանելիությունը, ինչպես նաև առաջացնել լրացուցիչ ռիսկեր՝ շուկայում չկարգավորվող ստվերային միջնորդական լուծումների հնարավոր տարածման տեսանկյունից։

Շուկայական հավասարակշռության և արդար մրցակցային միջավայրի պահպանման նպատակով EasyPay-ն արդեն դիմել է Մրցակցության և սպառողների շահերի պաշտպանության հանձնաժողովին և Հայաստանի Հանրապետության կենտրոնական բանկին։

Ընկերությունը վերահաստատում է իր պատրաստակամությունը շարունակելու մասնագիտական երկխոսությունը բոլոր շահագրգիռ կողմերի հետ և բաց է բանակցությունների համար՝ համոզված լինելով, որ արդյունավետ համագործակցությունը հնարավոր է բացառապես արդար տնտեսական պայմանների և փոխշահավետության սկզբունքի հիման վրա՝ ի շահ Հայաստանի վճարահաշվարկային համակարգի կայուն զարգացման և քաղաքացիների շահերի պաշտպանության»։

Նույնաբովանդակ հայտարարություն էր տարածել նաև «Թել-Սել» ընկերությունը։