19.05.2026 | 18:51
Բելառուսը մտադիր է մասնակցել Արցախի տարածքներում նախագծերին
Իրանի մի քանի քաղաքներում պայթյուններ են տեղի ունեցել
Քաղաքականություն
31.01.2026 | 18:41
Հունվարի 31-ին Իրանի մի քանի քաղաքներում պայթյուններ են տեղի ունեցել, հայտնում են տեղական ԶԼՄ-ները։ DW-ի փոխանցմամբ՝ ամենախոշոր պայթյունը գրանցվել է երկրի հարավում գտնվող նավահանգստային Բենդեր-Աբբաս քաղաքում։
Պետական հեռուստատեսության տվյալներով՝ պայթյունը տեղի է ունեցել բուլվար Մոալլեմի շրջանում գտնվող ութհարկանի շենքում, որի հետևանքով երկու հարկ ամբողջությամբ ավերվել է, վնասվել են ավտոմեքենաներ և խանութներ։ Tasnim գործակալության փոխանցմամբ՝ զոհվել է մեկ մարդ, ևս 14-ը՝ վիրավորվել։
Mehr գործակալությունը հաղորդում է նաև Իրանի հարավ-արևմուտքում գտնվող Ահվազ քաղաքում բնակելի համալիրում տեղի ունեցած պայթյունի մասին։ Նախնական տվյալներով՝ այնտեղ կարող է զոհված լինել չորս մարդ։ Տեղական փրկարար ծառայությունը հայտնել է, որ պատճառը, հավանաբար, գազի արտահոսքն է։
ԶԼՄ-ներում տեղեկություններ են շրջանառվել նաև Պարանդ և Թավրիզ քաղաքներում հնարավոր պայթյունների մասին, սակայն պաշտոնական հաստատում դեռ չկա։
Միաժամանակ սոցիալական ցանցերում տարածված լուրերը Բենդեր-Աբբասում ԻՀՊԿ ռազմածովային ուժերի հրամանատար Ալիռեզա Թանգսիրիի դեմ հնարավոր մահափորձի վերաբերյալ հերքվել են իրանական ԶԼՄ-ների կողմից։
Իսրայելի պաշտոնյաները հայտարարել են, որ Իսրայելը որևէ կապ չունի Իրանում տեղի ունեցած պայթյունների հետ։
Նշվում է նաև, որ Իրանի զինված ուժերը վերջին ժամերին ԱՄՆ-ի հետ լարվածության ֆոնին բերվել են լիակատար մարտական պատրաստության վիճակի։
