02.07.2026 | 12:18
«Բարև ձեզ, ինչի՞ եք եկել», «Ո՞վ եք Դուք, որ ասեք՝ ինչի եք եկել»․ բանավեճ ԱԺ-ում․ ՏԵՍԱՆՅՈՒԹ
Եվս մեկ քայլ դեպի ՀՀ-ի և ԵՄ-ի միջև պաշտպանության ոլորտում ավելի սերտ համագործակցություն. Կալասը՝ ՀՀ-ին 20 միլիոն եվրոյի աջակցության մասին
Քաղաքականություն
30.01.2026 | 11:33
ԵՄ Խորհուրդն ընդունել է Եվրոպական խաղաղության հիմնադրամի շրջանակում Հայաստանին 20 միլիոն եվրոյի օգնության միջոցառումը։ Նշվում է, որ օգնության միջոցառման նպատակն է՝ բարելավել ՀՀ զինված ուժերի լոգիստիկ կարողությունները՝ կենտրոնանալով ճգնաժամային և արտակարգ իրավիճակներում քաղաքացիական բնակչության պաշտպանության վրա։ Այն նաև կբարձրացնի Հայաստանի դիմադրողականությունը և կարագացնի նրա զինված ուժերի փոխգործունակությունը միջազգային ռազմական առաքելություններին և գործողություններին, այդ թվում՝ ԵՄ կողմից տեղակայվողներին, հնարավոր մասնակցության դեպքում։
Նշվում է, որ օգնության միջոցառումը կհիմնվի և կլրացնի 2024 թվականին մեկնարկած շարունակական օգնության միջոցառումը, որը ներառում է տեղակայվող վրանային ճամբար, և կընդլայնվի մինչև բրիգադի չափսի։
Այս որոշումից հետո Հայաստանին տրամադրվող ընդհանուր աջակցությունը կհասնի 30 միլիոն եվրոյի։
«Եվրոպական խաղաղության հիմնադրամի այս օգնության միջոցառումը ևս մեկ քայլ է դեպի ԵՄ-ի և Հայաստանի միջև անվտանգության և պաշտպանության ոլորտում ավելի սերտ համագործակցություն:Այս միջոցառմամբ ԵՄ-ն ցույց է տալիս իր հանձնառությունը՝ շարունակելու աջակցել Հայաստանի դիմադրողականությանը, որը նպաստում է ամբողջ տարածաշրջանի կայունությանը, խաղաղությանը և անվտանգությանը»,- ասել է Եվրոպական միության արտաքին գործերի և անվտանգության քաղաքականության հարցերով բարձր ներկայացուցիչ Կայա Կալլասը։
Աջակցությունը կտրամադրվի ԵՄ-ի և Հայաստանի գործընկերության շրջանակում, որը հիմնված է ընդհանուր արժեքների վրա և ուղղված է Հայաստանում և Հարավային Կովկասում խաղաղության, կայունության և բարգավաճման խթանմանը։
Նշվում է, որ ԵՄ-ն հանձնառու է ամրապնդել Հայաստանի հետ համապարփակ քաղաքական և տնտեսական գործընկերությունը՝ հիմնվելով ԵՄ-ՀՀ գործընկերության նոր ռազմավարական օրակարգի վրա։
Թարգմանությունը՝ Էմմա Չոբանյանի
