ԱՄՆ-ը սպառնում է նոր մաքսատուրքեր սահմանել Կուբա նավթ մատակարարող երկրների նկատմամբ

ԱՄՆ նախագահ Դոնալդ Թրամփը սպառնացել է նոր մաքսատուրքեր սահմանել Կուբա նավթ մատակարարող երկրների նկատմամբ՝ սրելով ճնշման արշավը կոմունիստական ​​​​կառավարմամբ կղզու նկատմամբ, գրում է France 24-ը։

Կուբայի պետական ​​լրատվամիջոցներն արձագանքել են Թրամփի հայտարարությանը՝ զգուշացնելով, որ որոշումը սպառնում է կաթվածահար անել էլեկտրաէներգիայի արտադրությունը, գյուղատնտեսական արտադրությունը, ջրամատակարարումը և առողջապահությունը արդեն իսկ ծանր տնտեսական ճգնաժամից տառապող կղզում։

«Ո՞րն է նպատակը։ Կուբայի ժողովրդի ցեղասպանությունը։ Կյանքի բոլոր ոլորտները կխեղդվեն ԱՄՆ կառավարության կողմից»,- ասվում է Կուբայի կառավարության հայտարարության մեջ։

Այս ամսվա սկզբին ԱՄՆ զինված ուժերի կողմից Վենեսուելայի նախագահ Նիկոլաս Մադուրոյի ձերբակալությունից ոգեշնչված՝ Թրամփը բազմիցս խոսել է Կուբայի դեմ գործելու և նրա ղեկավարության նկատմամբ ճնշում գործադրելու մասին։ Այս շաբաթ Թրամփը հայտարարել էր, որ «Կուբան փլուզվելու է»՝ հավելելով, որ Վենեսուելան, որը մի ժամանակ կղզու հիմնական նավթի մատակարարն էր, վերջերս նավթ կամ գումար չի ուղարկել Կուբա։

Անցյալ շաբաթ Reuters-ը հաղորդել էր, որ Մեքսիկան՝ Կուբայի հիմնական մատակարարը, այն բանից հետո, երբ Վենեսուելան դադարեցրել է մատակարարումները դեկտեմբերին, նույնպես վերանայում է նավթի մատակարարումը շարունակելու հարցը՝ աճող մտավախությունների ֆոնին, որ այդ քաղաքականության պատճառով կարող է ենթարկվել Միացյալ Նահանգների կողմից հաշվեհարդարի։

Կուբայի նախագահ Միգել Դիաս-Կանելն այս ամիս հայտարարել էր, որ Վաշինգտոնը բարոյական իրավունք չունի ստիպել Կուբային ստորագրել համաձայնագիր, այն բանից հետո, երբ Թրամփն առաջարկել էր  համաձայնագիր կնքել ԱՄՆ-ի հետ։

Թրամփը պաշտոնավարման երկրորդ ժամկետի ընթացքում օգտագործել է մաքսատուրքերի սպառնալիքը որպես արտաքին քաղաքականության գործիք։

Թարգմանությունը՝ Էմմա Չոբանյանի