Թրամփի վարչակազմը գաղտնի հանդիպումներ է ունեցել Կանադայի անջատողականների առաջնորդների հետ․ FT

ԱՄՆ նախագահ Դոնալդ Թրամփի վարչակազմը մի քանի գաղտնի հանդիպումներ է ունեցել կանադական «Alberta Prosperity Project» (APP) խմբի ներկայացուցիչների հետ, որն Ալբերտա նահանգի անկախության համար պայքարող անջատողական շարժում է։ Այս մասին հաղորդում է Financial Times-ը՝ հղում անելով աղբյուրներին, գրում է Meduza-ն։

FT-ի աղբյուրների համաձայն՝ 2025 թվականի ապրիլից ի վեր Վաշինգտոնում APP-ի ղեկավարները երեք անգամ հանդիպել են ԱՄՆ Պետքարտուղարության պաշտոնյաների հետ։ Փետրվարին նախատեսվում է ևս մեկ հանդիպում, որի ժամանակ APP-ի ներկայացուցիչները ցանկանում են խնդրել 500 միլիարդ դոլարի վարկ՝ անկախության հանրաքվեի դեպքում նահանգի կարիքները ֆինանսավորելու համար։

Հանդիպումներին մասնակցած APP-ի իրավաբանական խորհրդատու Ջեֆ Ռաթի խոսքով՝ ԱՄՆ-ը «չափազանց ոգևորված է ազատ և անկախ Ալբերտայի գաղափարով»։ Նա պնդում է, որ Թրամփի վարչակազմի հետ «շատ ավելի ամուր հարաբերություններ» ունի, քան Կանադայի վարչապետ Մարկ Քարնիի։

Պետքարտուղարության ներկայացուցիչը հայտարարել է, որ կառույցը պարբերաբար հանդիպում է քաղաքացիական հասարակության ներկայացուցիչների հետ, բայց որևէ պարտավորություն չի ստանձնել: Սպիտակ տունը նույնպես հաստատել է, որ հանդիպումները տեղի են ունեցել՝ նշելով, որ դրանք որևէ աջակցություն չեն ցուցաբերել: ԱՄՆ ֆինանսների նախարար Սքոթ Բեսենթի դիրքորոշմանը ծանոթ FT-ի աղբյուրի խոսքով՝ ո՛չ նա, ո՛չ էլ Ֆինանսների նախարարության մյուս պաշտոնյաները տեղյակ չեն վարկային առաջարկի մասին և մտադիր չեն քննարկել այն:

Կանադական Ալբերտա նահանգը հարուստ է նավթով. ըստ FT-ի՝ այն ամերիկյան շուկայում օտարերկրյա նավթի ամենամեծ աղբյուրն է։ Նշվում է, որ Alberta Prosperity Project-ի ներկայացուցիչների և Թրամփի վարչակազմի միջև հանդիպումները տեղի են ունենում Վաշինգտոնի և Օտտավայի միջև հարաբերություններում աճող լարվածության ֆոնին։

Դավոսի Համաշխարհային տնտեսական ֆորումում Կանադայի վարչապետ Մարկ Քարնին քննադատական ​​ելույթ ունեցավ և աջակցություն հայտնեց Գրենլանդիային Միացյալ Նահանգների հետ դիմակայության մեջ, իսկ Թրամփը հետագայում հայտարարեց, որ հետ է կանչում Կանադայի մասնակցության հրավերը իր կողմից ստեղծված Խաղաղության խորհրդին։

Թարգմանությունը՝ Էմմա Չոբանյանի