Կրեմլը հրաժարվել է մեկնաբանել ՌԴ-ի և Ուկրաինայի միջև էներգետիկ հրադադարի մասին հաղորդումները

Ռուսաստանի նախագահի մամուլի քարտուղար Դմիտրի Պեսկովը հայտարարել է, որ դեռևս չի կարող մեկնաբանել Մոսկվայի ու Կիևի միջև էներգետիկ հրադադարի շուրջ բանակցությունների վերաբերյալ տեղեկութունները։ Ինտերֆաքսի հաղորդմամբ՝ Պեսկովն այս մասին հայտարարել է՝ պատասխանելով հարցին՝ արդյո՞ք Ռուսաստանի և Ուկրաինայի միջև էներգետիկ հրադադարի շուրջ բանակցություններ են ընթանում։

Ավելի վաղ տելեգրամի ալիքներում տեղեկություններ էին շրջանառվում, որ Աբու Դաբիում Ռուսաստանի, ԱՄՆ-ի և Ուկրաինայի պատվիրակությունների հանդիպման ժամանակ կողմերը համաձայնության են եկել «էներգետիկ ոլորտի վրա հարձակումների ժամանակավոր մորատորիումի» շուրջ։ Ո՛չ Ռուսաստանը, ո՛չ էլ Ուկրաինան պաշտոնապես չեն հաստատել այս տեղեկությունը։

«Մենք տեղեկատվություն ենք ստանում, որ այսօր ժամը 7-ից սկսած՝ Ռուսաստանի զինված ուժերին արգվելվել է կրակ կիրառել Կիևի և Կիևի մարզի ցանկացած թիրախի, ինչպես նաև Ուկրաինայի ողջ տարածքում գտնվող ցանկացած ենթակառուցվածքի դեմ»,- հաղորդել է Romanov Lite-ը։

Երկու ժամ անց բլոգերը պարզաբանել է, որ «ցավոք, դա ճիշտ է»։

«Դա արդեն հաստատվել է։ Իսկապես, էներգետիկ հրադադարն ուժի մեջ է մտել  գիշերը։ Այն համաձայնեցվել է Աբու Դաբիում։ Սա ամոթալի է»,- հավելել է բլոգեր Alex Parker Returns։

Ուկրաինական Supernova+ ալիքն այսօր առավոտյան գրել է, որ «նմանատիպ հրաման կա նաև Ուկրաինայից. «Չհարձակվել ռուսական էներգետիկ ենթակառուցվածքների վրա…»։

Այնուամենայնիվ, տելեգրամ ալիքի հեղինակները նշել են, որ առաջին հերթին անհրաժեշտ է համոզվել, որ Ռուսաստանը կկատարի այս համաձայնությունը։

Թարգմանությունը՝ Էմմա Չոբանյանի