14.03.2026 | 18:02
Հրազդանի, Սևանի, Ապարանի, Արագածի, Աշոցքի տարածաշրջաններում ձյուն է տեղում
Իրանի շուրջ լարվածության ֆոնին՝ Արաղչին Թուրքիա է մեկնում
Քաղաքականություն
29.01.2026 | 18:37
Իրանի արտաքին գործերի նախարար Աբբաս Արաղչին վաղը Թուրքիա կայցելի՝ տարածաշրջանային և երկկողմ հարցեր քննարկելու համար: Սպասվում է, որ Թուրքիայի ԱԳ նախարար Հաքան Ֆիդանը հանդիպման ժամանակ կշեշտի Թուրքիայի դեմ լինելը Իրանում ռազմական միջամտություններին, հաղորդում է թուրքական TRT Haber-ը։
Թուրքիայի ԱԳՆ աղբյուրների համաձայն՝ Ֆիդանը Արաղչիի հետ հանդիպման ժամանակ կշեշտի Թուրքիայի պատրաստակամությունը՝ զարգացնելու երկկողմ հարաբերություններն այնպիսի մեխանիզմների միջոցով, ինչպիսին է 2014 թվականին ստեղծված Բարձր մակարդակի համագործակցության խորհուրդը, և ակտիվացնելու երկկողմ առևտրի ծավալը 30 միլիարդ դոլարի հասցնելու նպատակին հասնելու փոխադարձ ջանքերը:
Ֆիդանը կհայտարարի, որ Թուրքիան աջակցում է Իրանի միջուկային ծրագրի հետ կապված իրավիճակի արագ և խաղաղ լուծմանն ու պատրաստ է, անհրաժեշտության դեպքում, օգնություն ցուցաբերել։ Նա նաև կանդրադառնա Իրանում վերջերս տեղի ունեցած անկարգություններում PKK/PJAK կազմակերպության իրանական ճյուղի դերին՝ ընդգծելով, որ PJAK-ի լիակատար չեզոքացումը Իրանի անվտանգության համար անհրաժեշտություն է։
Հանդիպման ընթացքում անդրադարձ կլինի նաև Գազայի խաղաղության ծրագրի երկրորդ փուլին, Սիրիայում խաղաղության և անվտանգության ամրապնդմանը։
Նշենք, որ Ֆիդանը վերջին անգամ Իրան է այցելել 2025 թվականի նոյեմբերի 30-ին և հանդիպել նախագահ Մասուդ Փեզեշքիանի, Իրանի խորհրդարանի նախագահ Մոհամմադ Բաղեր Ղալիբաֆի, Իրանի Ազգային անվտանգության գերագույն խորհրդի ղեկավար Ալի Լարիջանիի և արտգործնախարար Աբբաս Արաղչիի հետ։
Իր հերթին, Արաղչին վերջին անգամ Թուրքիա այցելել է 2024 թվականի դեկտեմբերի 2-ին։
Թարգմանությունը՝ Էմմա Չոբանյանի
