02.07.2026 | 18:32
Արտահանումը խթանող գործակալություն կստեղծենք. Փաշինյան․ ՏԵՍԱՆՅՈՒԹ
ԵՄ-ն և Ադրբեջանը համաձայնության են եկել Նախիջևանում երկաթուղային նախագծի իրականացման շուրջ
Քաղաքականություն
29.01.2026 | 14:30
Եվրամիությունն ու Ադրբեջանն այսօր համաձայնել են ամրապնդել իրենց գործընկերությունը ԵՄ-ի «Գլոբալ դարպաս» նախաձեռնության և վերջերս մեկնարկած միջտարածաշրջանային կապերի ծրագրի շրջանակում։ Ադրբեջանում ԵՄ պատվիրակությունը հաղորդում է, որ կողմերը ձգտում են համատեղ բացահայտել նոր տնտեսական հնարավորություններ՝ տրանսպորտի, թվային տեխնոլոգիաների, էներգետիկայի և առևտրի ոլորտներում կայուն և դիմացկուն կապերի միջոցով, ինչպես նաև խթանել երկարաժամկետ համատեղ բարգավաճումը, համագործակցությունը և խաղաղությունը։
Եվրամիությունն ու Ադրբեջանը, Եվրոպական ներդրումային բանկի հետ համատեղ, համաձայնության են եկել սկսել Նախիջևանի երկաթուղու նախագծի տեխնիկական և տնտեսական հիմնավորման աշխատանքները: Սա նշանակալի ներդրում է Ադրբեջանում և ավելի լայն տարածաշրջանում շարժունակության և տնտեսական հոսքերի բարելավման առումով։
Տարածված հաղորդագրության համաձայն՝ այս երկաթուղին կլինի ավելի լայն Տրանսկասպյան տրանսպորտային միջանցքի մաս, որը նպատակ ունի կապել Եվրոպան և Կենտրոնական Ասիան՝ 15 օրվա նախատեսված տարանցիկ ժամանակահատվածով։
Նշվում է, որ Եվրոպայի և Ասիայի միջև բազմազան, հուսալի և կայուն երթուղիներն ընդհանուր ռազմավարական շահերից են բխում։ Դրանց օգուտները փոխադարձ են և նվազեցնում են գերկախվածության ռիսկերը։
Երկկողմ և տարածաշրջանային աջակցության ծրագրերի հետ մեկտեղ, ապագա առաջնահերթ նախագծերը կամրապնդեն ԵՄ-ի և Ադրբեջանի միջև տնտեսական կապերը՝ նորարարական ֆինանսական գործիքների միջոցով։ Դրանք նաև կաջակցեն Ադրբեջանի ջանքերին՝ դիվերսիֆիկացնելու իր տնտեսությունը, ամրապնդելու տարածաշրջանային կապվածությունը, ստեղծելու ներքին աշխատատեղեր և խթանելու ներառական ու կայուն գյուղական զարգացումը։
Թարգմանությունը՝ Էմմա Չոբանյանի
