Ռուսական զորքերը հարվածել են Զապորոժիեի մարզին․ երեք մարդ զոհվել է

Ռուսական զորքերը հունվարի լույս 29-ի գիշերը հարված են հասցրել Ուկրաինայի Զապորոժիեի մարզի Վոլնյանսկ քաղաքին։ Տարածաշրջանային ռազմական վարչակազմի ղեկավար Իվան Ֆյոդորովի տեղեկացմամբ՝ զոհվել է 3 մարդ՝ երկու կին և մեկ տղամարդ, մեկ վիրավոր կա, գրում է Current time-ը։

Ուկրաինայի արտակարգ իրավիճակների պետական ​​ծառայությունը նշում է, որ անօդաչու թռչող սարքերի հարվածները քաղաքի բնակելի թաղամասերի թիրախ են դարձել կեսգիշերի մոտ։ Վնասվել է յոթ մասնավոր տուն, մեկը՝ ավերվել։ Բնակելի շենքում բռնկված 100 քառակուսի մետր տարածքի հրդեհը և գազատար խողովակի հրդեհը մարվել են։

Դնեպրոպետրովսկի մարզում ռուսական հարձակման հետևանքով վիրավորվել է երկու մարդ, հրդեհվել է համայնքային կենտրոն, սրճարան և մեքենաներ։ Կրիվոյ Ռոգում վնասվել է մեկ հարկանի շենք և երկու մեքենա։

Օդեսայում ենթակառուցվածքային օբյեկտի վրա անօդաչու թռչող սարքեր են հարձակվել։ Քաղաքային վարչակազմի ղեկավար Սերգեյ Լիսակի խոսքով՝ տուժածների մասին տեղեկություններ չկան։

Ուկրաինայի ռազմաօդային ուժերի տվյալներով՝ գիշերն Ուկրաինայի վրա հարձակվել է 105 ռուսական անօդաչու թռչող սարք, որոնցից 84-ը չեզոքացվել է։

Ուկրաինայի իշխանությունները և միջազգային կազմակերպությունները քաղաքացիական ենթակառուցվածքների ու քաղաքացիական բնակչության վրա հարձակումները որակում են որպես Ռուսաստանի կողմից կատարված ռազմական հանցագործություններ, մինչդեռ Ռուսաստանի իշխանությունները հերքում են դա՝ պնդելով, որ հարձակումներն ուղղված են եղել ռազմական օբյեկտների վրա։

Թարգմանությունը՝ Էմմա Չոբանյանի