Ֆրանսիան աջակցել է Իրանի հեղափոխության պահապանների կորպուսը ԵՄ ահաբեկչական ցուցակում ներառելուն

Ֆրանսիան մտադիր է աջակցել Իտալիայի գլխավորած նախաձեռնությանը՝ Իրանի Իսլամական հեղափոխության պահապանների կորպուսը (ԻՀՊԿ) ներառել Եվրամիության «ահաբեկչական կազմակերպությունների» ցանկում,  հայտարարել է Ֆրանսիայի նախագահությունը այն բանից հետո, երբ կորպուսը մեղադրվել է երկրում բողոքի ցույցերի դաժան ճնշման գործում առաջատար դեր խաղալու համար, գրում է France24-ը։

«Ֆրանսիան աջակցում է Իրանի Իսլամական հեղափոխության պահապանների կորպուսի (ԻՀՊԿ) ընդգրկմանը ահաբեկչական կազմակերպությունների եվրոպական ցուցակում», – հայտարարել է Ելիսեյան պալատը։

«Իրանի ժողովրդի խաղաղ ապստամբության անտանելի ճնշումները չեն կարող անպատասխան մնալ։ [Իրանի ժողովրդի] ցուցաբերած արտակարգ քաջությունը իրենց նկատմամբ սանձազերծված կույր բռնության դեմ չի կարող ապարդյուն լինել»,- իր հերթին X-ում գրառման մեջ հավելել է արտգործնախարար Ժան-Նոել Բարրոն՝ հաստատելով, որ Ֆրանսիան կաջակցի ցուցակում ընդգրկվելուն։

Ֆրանսիան նախկինում տատանվում էր նման քայլին աջակցելու հարցում՝ մտավախություն ունենալով, որ դա կարող է խզել բոլոր կապերը Թեհրանի հետ։

ԵՄ-ի կողմից ահաբեկչական խմբավորում ճանաչելը կհանգեցնի ԻՀՊԿ անդամների ճանապարհորդության արգելքի, ակտիվների սառեցման և «ցուցակում ընդգրկված անձանց համար միջոցներ կամ տնտեսական ռեսուրսներ տրամադրելու արգելքի»՝ ըստ Եվրոպական խորհրդի կողմից սահմանված կանոնների։

Գերմանիայի կանցլեր Ֆրիդրիխ Մերցն իր աջակցությունն է հայտնել Իտալիայի ջանքերին՝ ԵՄ-ի կողմից ԻՀՊԿ-ն ահաբեկչական կազմակերպություն ճանաչելու համար։

Քանի որ Ֆրանսիան, Իտալիան և Գերմանիան այժմ կողմ են, որոշումը, հավանաբար, քաղաքականապես կհաստատվի հինգշաբթի։

ԱՄՆ-ում գործող Human Rights Activists News Agency-ի կողմից չորեքշաբթի հրապարակված հաշվետվության համաձայն՝ Իրանում ցույցերի ընթացքում զոհվել է առնվազն 6,221 մարդ, այդ թվում՝ 5,858 ցուցարար, 214 կառավարությանը կից ուժերի ներկայացուցիչ, 100 անչափահաս և 49 քաղաքացիական անձ, որոնք ցույցի չէին մասնակցում։

Թարգմանությունը՝ Էմմա Չոբանյանի