Ռուսաստանի ՔԿ-ն վերսկսել է Խաչատուրյան քույրերի՝ հոր սպանության գործի քննությունը

Ռուսաստանի Քննչական կոմիտեն վերսկսել է Անգելինա, Մարիա և Քրիստինա Խաչատուրյան քույրերի դեմ քրեական գործը։ Նրանք մեղադրվում են 2018 թվականին իրենց հորը՝ Միխայիլ Խաչատուրյանին սպանելու մասին։ Այս մասին Կոմերսանտին հայտնել է քույրերից մեկի փաստաբան Ալեքսեյ Պարշինը։

Գործը վերաբացվել է՝ պարզելու համար՝ արդյո՞ք քույրերը գործել են ինքնապաշտպանության նպատակով, թե՞ դա սպանություն է։ Փաստաբանը հավելել է, որ ո՛չ Քննչական կոմիտեն, ո՛չ էլ պաշտպանական կողմը դեռևս չեն ստացել Մոսկվայի քաղաքային դատարանի վերջնական որոշումը Միխայիլ Խաչատուրյանի գործով, որը հետմահու դատապարտվել էր դուստրերի նկատմամբ սեռական ոտնձգությունների համար։

«Որոշումը ստանալուց հետո մենք կներկայացնենք Խաչատուրյան քույրերի գործը կարճելու միջնորդություն»,- հավելել է   Պարշինը։

Խաչատուրյան քույրերը հորը՝ Միխայիլին սպանել են 2018 թվականի հուլիսի 27-ին։ Հետաքննությունը պարզել էր, որ աղջիկները նրան մի քանի անգամ դանակով և մուրճով հարվածել են։

Սկզբում հետաքննությունը նրանց գործողությունները գնահատել էր որպես դավադրություն։ Կրտսեր քրոջ դեմ գործն առանձնացվել է մնացած վարույթներից, քանի որ նա հանցագործության պահին անմեղսունակ է ճանաչվել։

Մեղադրյալների պաշտպանները պնդում են, որ քույրերը պաշտպանել են իրենց։

Քննչական կոմիտեի կողմից 2019 թվականին անցկացված հետաքննությունը պարզել էր, որ 2014 թվականից ի վեր Միխայիլ Խաչատուրյանը բռնություն է գործադրել աղջիկների նկատմամբ, ծեծել նրանց և ստիպել սեռական բնույթի գործողություններ կատարել։ 2025 թվականի ապրիլին Մոսկվայի Բուտիրսկի շրջանային դատարանը հետմահու Միխայիլ Խաչատուրյանին մեղավոր էր ճանաչել սեռական ոտնձգության, պոռնոգրաֆիայի տարածման և ծանր մարմնական վնասվածքներ պատճառելու մեջ։

Մահացածի քույրերը բողոքարկել էին վճիռը և պնդել նրա անմեղության հարցում, սակայն 2025 թվականի նոյեմբերին Մոսկվայի քաղաքային դատարանն անփոփոխ է թողել դատավճիռը։

Թարգմանությունը՝ Էմմա Չոբանյանի