28.07.2026 | 16:57
Սպասվում է առանց տեղումների եղանակ
Արաղչին հայտարարել է, որ Իրանն ԱՄՆ-ի հետ բանակցություններ չի խնդրել
Քաղաքականություն
28.01.2026 | 14:30
Իրանի արտաքին գործերի նախարար Աբբաս Արաղչին հայտարարել է, որ վերջին օրերին կապ չի հաստատել ԱՄՆ հատուկ բանագնաց Սթիվ Ուիթկոֆի հետ և բանակցություններ չի խնդրել, գրում է Reuters-ը, փոխանցում է Al Arabiya-ն։
ԱՄՆ նախագահ Դոնալդ Թրամփը երեքշաբթի հայտարարել էր, որ Իրանի ուղղությամբ լողում է ևս մեկ «նավատորմ», և որ հույս ունի, որ Թեհրանը գործարք կկնքի Վաշինգտոնի հետ։ Վաշինգտոնը լրացուցիչ ռազմական միջոցներ է տեղակայել Պարսից ծոցում՝ Իրանում տեղի ունեցած համազգային բողոքի ցույցերից հետո, որոնք հանգեցրին երկրում բողոքի ամենաարյունալի ճնշմանը 1979 թվականի Իսլամական հեղափոխությունից ի վեր։
«Վերջին օրերին իմ և Ուիթկոֆի միջև որևէ շփում չի եղել, և մեզանից բանակցությունների որևէ խնդրանք չի եղել։ Մեր դիրքորոշումը հստակ է՝ բանակցությունները չեն ուղեկցվում սպառնալիքներով, և բանակցությունները կարող են տեղի ունենալ միայն այն ժամանակ, երբ այլևս սպառնալիքներ և չափազանց պահանջներ չլինեն»,- ասել է Արաղչին պետական լրատվամիջոցներին՝ հավելելով, որ տարբեր միջնորդներ «խորհրդակցություններ են անցկացնում» և կապի մեջ են Թեհրանի հետ։
Երեքշաբթի Իրանի նախագահ Մասուդ Փեզեշքիանը Սաուդյան Արաբիայի թագաժառանգ Մուհամմեդ բին Սալմանին ասել էր, որ Թեհրանը ողջունում է միջազգային իրավունքի շրջանակում պատերազմը կանխող ցանկացած գործընթաց։
Թարգմանությունը՝ Էմմա Չոբանյանի
