Քաղաքականություն
28.01.2026 | 16:09
Սեուլի դատարանը Հարավային Կորեայի նախկին նախագահի կնոջը՝ Կիմ Գոն Հիին դատապարտել է մեկ տարի ութ ամիս ժամկետով ազատազրկման։ Նա մեղավոր է ճանաչվել աղանդավորական Միավորման եկեղեցուց թանկարժեք նվերներ ընդունելու մեջ՝ հովանավորության դիմաց, հաղորդում է Yonhap գործակալությունը։ Լրատվամիջոցների հաղորդագրությունների համաձայն՝ ի թիվս այլ իրերի՝ նա ստացել է Chanel-ի երկու պայուսակ և ադամանդե վզնոց, գրում է The Insider-ը:
Սա Կիմ Գոն Հիին առաջադրված միակ մեղադրանքը չէ: Գործակալությունը նշում է, որ Կիմը կասկածվում է նաև բաժնետոմսերի մանիպուլյացիայի և քաղաքական միջոցների մասին օրենքի խախտման մեջ, սակայն արդարացվել է մյուս մեղադրանքների մասով: Նրան մեղադրում էին, օրինակ, երկրում BMW-ի պաշտոնական դիլերի՝ Deutsch Motors-ի հետ դավադրության մեջ՝ բաժնետոմսերի գների մանիպուլյացիայի միջոցով անօրինական շահույթ ստանալու համար։
Հատուկ դատախազի թիմը նրա համար պահանջել էր 15 տարվա ազատազրկում:
Կիմը ձերբակալվել է 2025 թվականի օգոստոսին։ Ամուսնու՝ Յուն Սոկ Յոլի հետ միասին նրանք դարձել են առաջին նախագահական զույգը, որը միաժամանակ բանտարկության մեջ է։
Յուն Սոկ Յոլը Կորեայի նախագահն էր 2022 թվականի մայիսից։ 2024 թվականի դեկտեմբերին Ազգային ժողովը նրան հեռացրեց պաշտոնից՝ կարճ ժամանակով ռազմական դրություն հայտարարելու համար, ինչը կասկածներ առաջացրեց իշխանության յուրացման հարցում։ Իմփիչմենթը հաստատվեց միայն 2025 թվականի ապրիլին, և Յուն Սոկ Յոլը ձերբակալվեց միայն մի քանի անհաջող փորձերից հետո։
Հունվարին նախկին նախագահը դատապարտվեց հինգ տարվա ազատազրկման՝ պաշտոնեական լիազորությունները չարաշահելու և ձերբակալությանը խոչընդոտելու փորձի մեղադրանքով։ Մի խումբ դատախազներ պահանջել էին նրա նկատմամբ մահապատիժ կիրառել։
Թարգմանությունը՝ Էմմա Չոբանյանի
