27.04.2026 | 23:25
ՔԿ նախագահ Արթուր Պողոսյանի մասին գրառման համար ֆեյսբուքյան օգտատիրոջը մեղադրանք է առաջադրվել
Հարավային Կորեայի նախկին նախագահը 5 տարվա ազատազրկման է դատապարտվել
Քաղաքականություն
16.01.2026 | 14:30
Սեուլի դատարանը Հարավային Կորեայի նախկին նախագահ Յուն Սոկ Յոլին դատապարտել է 5 տարի ժամկետով ազատազրկման՝ պաշտոնեական լիազորությունների չարաշահման և ձերբակալությանը խոչընդոտելու փորձի մեղադրանքով։ Այս մասին հայտնել է հարավկորեական Yonhap գործակալությունը, գրում է The Insider-ը։
Սա նախկին նախագահի համար միայն առաջին դատավճիռն է։ Յունի Սոկ Յոլի դեմ հարուցվել է, ընդհանուր առմամբ, ութ քրեական գործ՝ կապված երկրում 2024 թվականի դեկտեմբերին կարճատև ռազմական դրություն մտցնելու հետ։ Նրան մեղադրանք է առաջադրվել մի շարք հանցագործությունների համար, այդ թվում՝ լիազորությունների չարաշահման և ընտրական օրենսդրության խախտումների։
Երկրի նախկին առաջնորդի դեմ առաջադրված ամենալուրջ մեղադրանքը ապստամբության հրահրումն է: Այս շաբաթվա սկզբին դատախազների մի խումբ պահանջել էր այս գործով մահապատիժ: Այս պահանջը աննախադեպ է ժամանակակից Հարավային Կորեայում: Չնայած երկրի քրեական օրենսդրությամբ պաշտոնապես նախատեսված է մահապատիժ, այս պատժաձևը չի իրականացվել 1997 թվականից՝ մոտավորապես 30 տարի։
2025 թվականի նոյեմբերին դատախազները նախկին նախագահի դեմ լրացուցիչ մեղադրանքներ են առաջադրել՝ պաշտոնեական լիազորությունների չարաշահման և Հյուսիսային Կորեային օգնելու համար: Նշվում է, որ պատրվակը 2024 թվականի աշնանը Հյուսիսային Կորեայի ուղղությամբ հարավկորեական անօդաչու թռչող սարքի արձակումն էր։ Քննությունը կարծում է, այս միջադեպը կարող էր օգտագործվել ռազմական դրություն մտցնելու պատրվակի համար։
Յունը Կորեայի Հանրապետության նախագահն էր 2022 թվականի մայիսից: 2024 թվականի դեկտեմբերին խորհրդարանը նրան հեռացրել էր պաշտոնից՝ կարճատև ռազմական դրություն մտցնելուց հետո, և 2025 թվականի գարնանը նրա իմպիչմենտը վերջնական հաստատվել էր:
2025 թվականի օգոստոսին Սեուլի դատարանը նախկին նախագահի և նրա կնոջ նկատմամբ ձերբակալման օրդեր էր տվել:
Թարգմանությունը՝ Էմմա Չոբանյանի
