13.10.2026 | 23:30
«Կազիմիր Պուլասկի» հիմնադրամի նախագահի հետ քննարկվել են փոխգործակցության հարցեր
Բաղրամյան 26-ն ավելի հարմարավետ է աշխատակիցների համար. Արմեն Սարգսյան
09.11.2018 | 16:42
Անձամբ ինձ համար կարևոր չէ, թե որ շենքում կաշխատեմ, կարևոր է աշխատակիցների հարմարավետությունը: Այս մասին այսօր՝ նոյեմբերի 9-ին լրագրողների հետ զրույցում ասաց ՀՀ նախագահ Արմեն Սարգսյանը՝ պատասխանելով Բաղրամյան 26-ը նախագահի աշխատակազմին փոխանցելու՝ կառավարության որոշման մասին հարցին:
«Կարևոր է, թե աշխատակիցների համար որ շենքն է ավելի հարմարավետ աշխատանքի համար: Ցավոք, Մաշտոցի շենքը, որ հոյակապ շենք է, շատ լավ հարևանությամբ՝ նույն Մատենադարանի, աշխատակիցների համար հարմար չէ: Կարծում եմ՝ ներկայացուցչական իմաստով լավ շենք է, և ապագայում կարող է ծառայել»,- նշեց նախագահը:
Նա, միաժամանակ, հավելեց, որ դրա համար դեռ որոշակի գործընթաց է անհրաժեշտ. խորհրդարանը պետք է համապատասխան օրենքն ընդունի: Հարցին, արդյո՞ք Բաղրամյան 26-ը նախագահի աշխատակազմին վերադարձնելու որոշումը վարչապետի կողմից բարի կամքի դրսևորում էր, Արմեն Սարգսյանը պատասխանեց. «Կարծում եմ՝ սա նոր Հայաստանի նոր քայլերն են: Եվ կարծում եմ՝ ճիշտ է գնահատականը, որ մեր երկիրը պետք է առաջ գնա, որտեղ բոլորս միասին՝ վարչապետ, նախագահ, Ազգային ժողով, պետք է համագործակցենք և աշխատենք մեկ նպատակի համար: Ես պատրաստ եմ և՛ Ազգային ժողովի, և՛ կառավարության, և՛ իհարկե վարչապետի հետ լուրջ համագործակցության՝ ի շահ մեր երկրի»:
