19.05.2026 | 21:50
Հրդեհի ահազանգ Մասիս քաղաքում․ ըստ նախնական տվյալների՝ կան երկու զոհ և երկու տուժած
Ֆրանսիայի խորհրդարանը քվեարկել է 15 տարեկանից փոքր երեխաների համար սոցցանցերի արգելքի օգտին
Քաղաքականություն
27.01.2026 | 15:10
Ֆրանսիայի Ազգային ժողովը (խորհրդարանի ստորին պալատ) հաստատել է 15 տարեկանից փոքր դեռահասների համար սոցիալական ցանցեր մուտքն արգելող օրինագիծը: Փաստաթղթին կողմ է քվեարկել 116 պատգամավոր, դեմ՝ 23-ը։ Օրինագիծն այժմ կուղարկվի Սենատի (վերին պալատ) քննարկմանը, գրում է DW-ի ռուսական ծառայությունը։
Օրինագիծը նշում է, որ «սոցիալական ցանցեր մուտք գործելն արգելվում է 15 տարեկանից փոքր անչափահասների համար»։ Ըստ Le Monde-ի՝ այս ձևակերպումը «սոցիալական ցանցերի վրա որևէ հստակ պարտավորություն չի դնում»։
Նշվում է, որ օրենսդիրները ստիպված են եղել տեքստն այսպես ձևակերպել, քանի որ սոցցանցերի կարգավորումը Եվրոպական հանձնաժողովի իրավասությունն է։ Ֆրանսիայի կառավարությունը նույնպես աջակցել է այս ձևակերպմանը՝ ակնկալելով, որ օրինագիծը կստիպի առցանց հարթակներին «ներդնել տարիքի ստուգման համակարգեր՝ այս միջոցառման արդյունավետությունն ապահովելու համար»։
Բացի այդ, օրինագծի մեկ այլ հոդվածով առաջարկվում է ընդլայնել 11-15 տարեկան երեխաների համար քոլեջներում և միջնակարգ դպրոցներում բջջային հեռախոսների օգտագործման արգելքը, որը սահմանվել էր 2018 թվականին: Այժմ նախատեսվում է արգելքը տարածել նաև ավագ դպրոցների վրա:
Ֆրանսիայի նախագահ Էմանուել Մակրոնի խնդրանքով կառավարությունը նախաձեռնել է օրինագծի քննարկման արագացված ընթացակարգ: Դրա համար խորհրդարանի յուրաքանչյուր պալատում կպահանջվի միայն մեկ ընթերցում՝ երկուսի փոխարեն։
Նախկին վարչապետ Գաբրիել Աթալը, որը գլխավորում է նախագահի «Վերածնունդ» կուսակցության խմբակցությունը Ազգային ժողովում, հույս է հայտնել, որ Սենատը կընդունի օրինագիծն արդեն փետրվարի կեսերին: Նա նշել է, որ եթե օրինագիծն ընդունվի մեկ ամսվա ընթացքում, 15 տարեկանից փոքր օգտատերերի համար նոր հաշիվներ ստեղծելու արգելքն ուժի մեջ կմտնի սեպտեմբերի 1-ից, և հարթակները պարտավոր կլինեն ջնջել անչափահասների առկա հաշիվները մինչև դեկտեմբերի 31-ը։
«Մեր երեխաների մտքերը չեն վաճառվում։ Ո՛չ ամերիկյան հարթակներին, ո՛չ էլ չինական ցանցերին։ Սեպտեմբերի 1-ին մեր երեխաներն ու դեռահասները վերջապես պաշտպանված կլինեն։ Ես կապահովեմ դա»,- X-ում գրել է Մակրոնը։
Թարգմանությունը՝ Էմմա Չոբանյանի
