ԱՄՆ-ը հերքել է, որ Ուկրաինայի անվտանգության երաշխիքները կապել է Կիևի կողմից տարածքային զիջումների հետ

ԱՄՆ նախագահ Դոնալդ Թրամփի վարչակազմն Ուկրաինային հասկացրել է, որ Վաշինգտոնի անվտանգության երաշխիքները կախված են Կիևի կողմից խաղաղության պայմանագրին համաձայնությունից, որը կներառի Դոնբասը Ռուսաստանին հանձնելը, հաղորդում է Financial Times-ը՝ հղում անելով բանակցություններին ծանոթ ութ աղբյուրների։ Եթե Ուկրաինան համաձայնի զորքերը դուրս բերել Դոնբասից, Վաշինգտոնը, ըստ FT-ի երկու աղբյուրների, նաև նախնական պատրաստ է Ուկրաինային ավելի շատ զենք տրամադրել՝ խաղաղ ժամանակ Ուկրաինայի զինված ուժերն ամրացնելու համար, գրում է Meduza-ն։

Ուկրաինացի ու եվրոպացի պաշտոնյաներն ԱՄՆ դիրքորոշումը որակել են որպես Կիևի վրա ճնշում գործադրելու փորձ: Ուկրաինացի բարձրաստիճան պաշտոնյայի խոսքով՝ ԱՄՆ-ը «կանգ է առնում ամեն անգամ, երբ խոսքը վերաբերում է անվտանգության երաշխիքների ստորագրմանը», և գնալով ավելի անհասկանալի է դառնում՝ արդյո՞ք Սպիտակ տունը պարտավորություններ կստանձնի։

Միևնույն ժամանակ, ԱՄՆ դիրքորոշմանը ծանոթ աղբյուրը պնդում է, որ Վաշինգտոնը «չի փորձում որևէ տարածքային զիջում պարտադրել Ուկրաինային»։ Նրա խոսքով՝ ԱՄՆ-ը հայտարարել է, որ անվտանգության երաշխիքները կախված են երկու կողմերի կողմից խաղաղության պայմանագրին համաձայնվելուց, սակայն դրա բովանդակությունը «Ռուսաստանի և Ուկրաինայի որոշելիք հարցն է»։

Սպիտակ տան մամուլի քարտուղարի տեղակալ Աննա Քելլին ԱՄՆ-ի կողմից Ուկրաինայի նկատմամբ պահանջների մասին  տեղեկություններն անվանել է «բացարձակ սուտ»։ Նա ասել է, որ ԱՄՆ-ի միակ դերը խաղաղության գործընթացում «երկու կողմերին միավորելն է՝ համաձայնության հասնելու համար»։

«Ցավալի է, որ Financial Times-ը թույլ է տալիս չարամիտ գործիչներին անանուն ստել՝ խափանելու խաղաղության գործընթացը, որը գերազանց վիճակում է Աբու Դաբիում տեղի ունեցած պատմական եռակողմ հանդիպումից հետո»,- հավելել է նա։

Հունվարի 23-24-ը Աբու Դաբիում տեղի ունեցան ԱՄՆ-ի, Ուկրաինայի և Ռուսաստանի միջև եռակողմ բանակցություններ, որոնցում Սպիտակ տան ներկայացուցիչները հանդես եկան որպես միջնորդներ ուկրաինական և ռուսական պատվիրակությունների միջև: Axios-ի աղբյուրների համաձայն՝ բանակցությունների ընթացքում քննարկվել են բոլոր վիճելի հարցերը, այդ թվում՝ Դոնբասը, և դրանք անցել են շատ լավ աշխատանքային մթնոլորտում և «մի պահ բոլորը գրեթե ընկերներ էին թվում»:

Հաջորդ օրը Վիլնյուս կատարած այցի ժամանակ Զելենսկին, պատասխանելով բանակցությունների վերաբերյալ հարցերին, ասել էր, որ Ուկրաինայի դիրքորոշումը տարածքների վերաբերյալ չի փոխվել, և բոլոր կողմերը պետք է պատրաստ լինեն փոխզիջման: Նա հավելել է, որ ԱՄՆ-ի հետ երկկողմ անվտանգության երաշխիքները 100%-ով պատրաստ են, և Կիևն այժմ սպասում է ստորագրման ամսաթվին և վայրին:

Եռակողմ բանակցությունների հաջորդ փուլը տեղի կունենա դարձյալ Աբու Դաբիում՝ փետրվարի 1-ին:

Թարգմանությունը՝ Էմմա Չոբանյանի