20.02.2026 | 16:02
Ժաննա Անդրեասյանը հանդիպել է դեսպան Ալեքսանդրա Քոուլին
ԵԽԽՎ-ն նոր նախագահ ունի
Քաղաքականություն
26.01.2026 | 18:26
Եվրոպայի խորհրդի խորհրդարանական վեհաժողովի նոր նախագահ է ընտրվել սոցիալիստների, դեմոկրատների և կանաչների ավստրիական խմբակցության ներկայացուցիչ Պետրա Բայրը։ Նա առաջին փուլում ստացել է բացարձակ մեծամասնություն՝ 164 ձայնով, իսկ մյուս թեկնածու Վիկտորիա Տիբլոմը (Շվեդիա, ALDE) 50 ձայն է ստացել։ Նա պաշտոնավարելու է մեկ տարի ժամկետով, որը կարող է մեկ անգամ երկարաձգվել։
Բայրը հաջորդում է Թեոդորոս Ռուսոպուլոսին (Հունաստան), որը պաշտոնավարում էր 2024 թվականի հունվարից։ Նա ԵԽԽՎ 36-րդ նախագահն է և 1949 թվականից ի վեր երրորդ ավստրիացին՝ Պետեր Շիդերից (2002-05) և Կարլ Չերնեցից (1975-78) հետո։ Նա հինգերորդ կինն է, որը զբաղեցնում է այս պաշտոնը։
«Մեզ միավորում է Եվրոպայի և աշխարհի՝ առանց պատերազմի տեսլականը։ Եվ մեզ միավորում են մեր բոլոր նվաճումները, մեր կոնվենցիաները և համոզմունքները։ վրոպայի խորհուրդը երբեք չպետք է լռի անարդարության առջև, երբ ժողովրդավարական նվաճումները գտնվում են աճող ճնշման տակ, և երբ անհատները զրկվում են իրենց ազատությունից միայն իրենց համոզմունքների պատճառով»,- ասել է ԵԽԽՎ նորընտիր նախագահը երդմնակալության ելույթում՝ գովաբանելով Մարդու իրավունքների եվրոպական կոնվենցիայի արժեքը՝ «կենդանի գործիք, որն ազդում է իրական կյանքի վրա»։
Հիշատակելով Ռուսաստանի կողմից Ուկրաինայի դեմ սանձազերծված ագրեսիվ պատերազմը՝ նա նշել է, որ Եվրոպայի խորհուրդը կշարունակի վճռականորեն պաշտպանել միջազգային իրավունքը, տարածքային ամբողջականությունը և հակամարտությունների խաղաղ կարգավորումը։
«Այս պատերազմը ոչ միայն պետության ինքնիշխանության դեմ հարձակում է։ Այն միջազգային իրավունքի, եվրոպական խաղաղության կարգի և մարդու իրավունքների հիմքերի դեմ հարձակում է։ Օրենքի ուժը, այլ ոչ թե ուժեղի օրենքը պետք է գերակշռի»,- հայտարարել է նա։
Բայրը նաև ասել է, որ ցանկանում է Եվրոպայի խորհուրդն ավելի մոտեցնել իր քաղաքացիներին, հատկապես՝ երիտասարդներին։ Ավելին, նա կարծում է, որ լայնորեն տեսանելի Եվրոպայի խորհուրդը ներառում է ավելի սերտ և ռազմավարական համագործակցություն իր բոլոր մարմինների՝ Խորհրդարանական վեհաժողովի, Նախարարների կոմիտեի, Դատարանի, Գլխավոր քարտուղարի և բոլոր հաստատությունների միջև:
«Միասին մենք կարող ենք ամրապնդել համախմբվածությունը, տեսանելիությունը և քաղաքական ազդեցությունը»,- եզրափակել է նա:
Թարգմանությունը՝ Էմմա Չոբանյանի
