20.02.2026 | 16:02
Ժաննա Անդրեասյանը հանդիպել է դեսպան Ալեքսանդրա Քոուլին
ՌԴ-ն կորցնում է իր ազդեցությունը Հարավային Կովկասում «Թրամփի երթուղու» պատճառով. Ուկրաինայի արտաքին հետախուզություն
Քաղաքականություն
26.01.2026 | 18:48
ԱՄՆ-ն և Հայաստանը գործարկում են TRIPP երթուղին՝ զրկելով Ռուսաստանին Հարավային Կովկասում գլխավոր խաղացողի դերից: Նոր միջանցքը կկապի Ասիան և Եվրոպան Հայաստանի և Ադրբեջանի միջոցով՝ առանց Մոսկվայի մասնակցության։ Այս մասին գրում է ՌԲԿ Ուկրաինան՝ հղում անելով Ուկրաինայի Արտաքին հետախուզության ծառայությանը։
Ըստ հրապարակման՝ «Թրամփի երթուղի՝ միջազգային խաղաղության և բարգավաճման համար» նախագիծը (TRIPP) դառնում է տարածաշրջանում նոր աշխարհաքաղաքական գործոն։ Այն Միացյալ Նահանգներին տրամադրում է հատուկ իրավունքներ՝ տարանցիկ միջանցքը զարգացնելու համար։ Հայ-ամերիկյան համատեղ կառավարման ընկերությունը կստանա նախագծի վերահսկողությունը հաջորդ 49 տարիների ընթացքում։
«TRIPP-ը վերջնականապես զրկում է Ռուսաստանին Հարավային Կովկասում խոշոր խաղացողի իր դիրքից»,- նշում է ուկրաինական հետախուզական ծառայությունը։
TRIPP նախագիծը ներառում է նավթի և գազի խողովակաշարերի, օպտիկամանրաթելային ցանցերի, ինչպես նաև երկաթուղային և ճանապարհային ենթակառուցվածքների կառուցում Իրանին սահմանակից երկաթուղային գծի երկայնքով։ Նշվում է, որ միջանցքը, ըստ շահառուների տրամաբանության, կկազմի «կարևոր օղակ» Տրանսկասպյան երթուղում՝ անցնելով Չինաստանի, Ղազախստանի, Կասպից ծովի, Ադրբեջանի, Վրաստանի և այնուհետև՝ Թուրքիայի և եվրոպական երկրների միջով։
Ըստ ՀՀ արտաքին գործերի նախարար Արարատ Միրզոյանի՝ Ռուսաստանի մասնակցությունը նախագծին նույնիսկ չի քննարկվել ամերիկյան և հայկական կողմերի կողմից։
Հետախուզական ծառայությունը նշում է, թե ՀՀ վարչապետ Նիկոլ Փաշինյանը գրեթե վերջնագրի նման դիմել է «Ռուսական երկաթուղիներ» ընկերությանը և հայկական երկաթուղու ներկայիս կոնցեսիոներին՝ անհապաղ վերականգնել վնասված գծերը մինչև Ադրբեջանի և Թուրքիայի սահմանները։ Հակառակ դեպքում, դա կարվի Հայաստանի հաշվին և հարցեր կառաջացնի տարածաշրջանում Ռուսաստանի ներկայության նպատակահարմարության վերաբերյալ։
Թարգմանությունը՝ Էմմա Չոբանյանի
