Յուրա Բադալյանն ինձ ասաց՝ Հոկտեմբերի 27 եմ փակել, քո տղայի գործն ի՞նչ է որ․ մահացած զինծառայող Արթուր Ղազարյանի մայր

Իմ տղան եղել է առողջ, ըստ բժշկական փաստաթղթերի՝ որևէ հիվանդություն չի ունեցել, տարել են բանակ ու կերել տղայիս գլուխը, ու ես չեմ հասկանում՝ ինչո՞ւ։ Այս մասին այսօր հրավիրված «Վարչապետի և սևազգեստ մայրերի հանդիպումից ամիսներ անց․ ո՞վ կամ ի՞նչն է խանգարում զինծառայող Արթուր Ղազարյանի մահվան իրական հանգամանքների բացահայտմանը» թեմայով քննարկման ժամանակ ասաց մահացած զինծառայող Արթուր Ղազարյանի մայրը։

Վերջինս նշեց, որ տղայի մահվան հանգամանքները բացահայտելու համար դիմել է բազմաթիվ ատյանների, նաև Քննչական վարչության պետ Յուրա Բադալյանին, սակայն  իրեն համոզող որևէ փաստարկ չի լսել։

«Յուրա Բադալյանն ինձ մի անգամ ասաց, տիկի Իրինա, ես Հոկտեմբերի 27 եմ փակել, այդ գործն ի՞նչ է որ․․․ Յուրա Բադալյան, Արմեն Հարութունյան, Արթուր Դավթյան․ ահա նրանք են կանգնած իմ երեխայի մահվան հետևում»,- ասաց մահացած զինծառայողի մայրը՝ տիկին Իրինան՝ շեշտելով, որ Յուրա Բադալյանի նմաններն իրավունք չունեն այդ համակարգում աշխատելու։

Տիկին Իրինան շնորհակալություն հայտնեց վարչապետ Նիկոլ Փաշինյանին, նշեց, որ այժմ որդու կարճված քրեական գործը վերաբացվել է, սակայն խնդրեց հետամուտ լինել, որ համակարգը մաքրվի, հակառակ պարագայում վերաբացված գործը չի կարող ենթարկվել արդարացի քննության։

Քննարկման մասնակից «Հելսինկյան ասոցիացիա» ՀԿ նախագահ, իրավապաշտպան Նինա Կարապետյանցն էլ հավելեց, որ դատախազությունն ու քննչական մարմինները չեն իրականացնում իրենց գործառույթը, և Արթուր Դավթյանի՝ Փաշինյանին ասած այն խոսքերը, թե ինքը ստիպված է առաջնորդվել օրենքներով, բացարձակ սուտ են․ «Պարո՛ն Փաշինյան, Ձեզ ստում են։ Տասը տարի շարունակ գործեր են քննում՝ ծածկադմփոց անելու և կոծկելու համար։ Մարդիկ կան,  որոնք տասը տարի շարունակ պայքարում են իրենց երեխաների սպանության գործը բացահայտելու համար, իսկ դա հանցագործություն է դատախազության, դատարանների կողմից։ Սևազգեստ մայրերը 18 տարի է՝ պայքարում են, ես կարծում եմ, որ այստեղ տեղի  է ունենում դիտավորություն, իսկ դա պետության դեմ իրականացված հանցագործություն է»։