20.02.2026 | 18:52
Գրողը տանի, կա դատարան, գործը մտցրեք, պարզեք` Դանիելյանն արդա՞ր է, թե՞ չէ. ծնող․ ՏԵՍԱՆՅՈՒԹ
Զելենսկին հայտարարել է, որ ԱՄՆ-ի կողմից անվտանգության երաշխիքների փաստաթուղթը 100%-ով պատրաստ է
Քաղաքականություն
26.01.2026 | 12:50
Ուկրաինայի անվտանգության երաշխիքների վերաբերյալ ԱՄՆ-ի փաստաթուղթն ամբողջությամբ պատրաստ է, և Կիևը սպասում է դրա ստորագրման ժամանակին և վայրին, հայտարարել է Ուկրաինայի նախագահ Վլադիմիր Զելենսկին՝ նշելով, որ Աբու Դաբիում Ռուսաստանի հետ շաբաթավերջին կայացած բանակցություններում որոշակի առաջընթաց է գրանցվել, գրում է Reuters-ը։
«Մեզ համար անվտանգության երաշխիքները, առաջին հերթին, Միացյալ Նահանգների կողմից անվտանգության երաշխիքներն են։ Փաստաթուղթը 100%-ով պատրաստ է, և մենք սպասում ենք, որ մեր գործընկերները հաստատեն այն ստորագրելու ամսաթիվը և վայրը»,- Վիլնյուս կատարած այցի ժամանակ մամուլի ասուլիսում ասել է Զելենսկին։
Նա նշել է, որ այնուհետև փաստաթուղթը կուղարկվի ԱՄՆ Կոնգրես և Ուկրաինայի խորհրդարան՝ վավերացման։
Ուրբաթ և շաբաթ օրերին ուկրաինացի և ռուս բանակցողներն Աբու Դաբիում անցկացրել են առաջին եռակողմ հանդիպումը ԱՄՆ միջնորդների մասնակցությամբ՝ քննարկելու գրեթե չորս տարի տևած պատերազմին վերջ դնելու՝ Վաշինգտոնի ծրագիրը, սակայն համաձայնության չեն հասել։
«[Աբու Դաբիում] քննարկվում է [ԱՄՆ] 20 կետանոց ծրագիրը և խնդրահարույց հարցերը։ Կային շատ խնդրահարույց հարցեր, բայց հիմա դրանք ավելի քիչ են»,- ասել է Զելենսկին։
Նա նշել է, որ Մոսկվան ցանկանում է անել հնարավոր ամեն ինչ, որպեսզի Ուկրաինան հրաժարվի արևելյան շրջաններից, որոնք Մոսկվան չի կարողացել գրավել իր լայնածավալ ներխուժումից ի վեր, որը հանգեցրեց պատերազմին։ Սակայն Կիևը, Զելենսկիի խոսքով, չի փոխել իր դիրքորոշումը, որ Ուկրաինայի տարածքային ամբողջականությունը պետք է պահպանվի։
«Սրանք երկու հիմնարար տարբեր դիրքորոշումներ են՝ Ուկրաինայի և Ռուսաստանի։ Ամերիկացիները փորձում են փոխզիջում գտնել»,- ասել է Զելենսկին՝ հավելելով, որ բոլոր կողմերը պետք է պատրաստ լինեն փոխզիջման, այդ թվում՝ ամերիկացիները։
Թարգմանությունը՝ Էմմա Չոբանյանի
