Ձնամաքրման աշխատանքները բավարար եմ գնահատում. Ավինյան. ՏԵՍԱՆՅՈՒԹ

«Հիդրոմետ ծառայության տեղեկատվության համաձայն՝ նախորդ շաբաթվա ամսի 20-ին և 23-ին սպասվում էին ձյան տեղումներ։ Ամսի 20-ի տեղումները թույլ էին, իրականացրել ենք աշխատանքներ, դրանից հետո եղել է կտրուկ անկում, լուսադեմին նորից իրականացվել են փողոցների մշակման աշխատանքներ, որևէ խնդիր չենք ունեցել»,- Երևանի քաղաքապետարանի գործակարգավարական խորհրդակցությանն ասաց քաղաքապետի խորհրդական Կամո Արեյանը։

«Ժամը 10։30-ի դրությամբ «ԵԱՍՄ» հիմնարկի բոլոր մեքենա-մեխանիզմները՝ աղով-ավազով բեռնված, տարբեր եզրաչափի, տարբեր ֆունկցիայի՝ 37 բազմաֆունկցիոնալ մեծ, 12 փոքր մեքենաները, 49 միավոր ամբողջությամբ տեղակայված են եղել վարչական շրջաններում՝ ըստ նախապես մշակված մեր դիսլոկացիոն սխեմայի»,- զեկուցեց Արեյանը։

Պաշտոնյայի խոսքով՝ մոբիլիզացված է եղել 137 միավոր տեխնիկա, աշխատել է մոտ 650 բանվոր։

«Մաքրման աշխատանքները տևել են մինչև ուշ երեկո, որից հետո, նկատի ունենալով ջերմաստիճանի անկումը, առավոտյան 04։30-ից, այսինքն՝ 23 լույս 24-ի գիշերը, ամբողջ տեխնիկան դուրս է եկել փողոց և մշակել բոլոր փողոցները։ 24-ի ժամը 10-ի դրությամբ մայրաքաղաքի բոլոր կենտրոնական և մասամբ երկրորդային փողոցները լրիվ մաքրված են եղել ձյան և սառույցի ծածկույթից, եղել է սև ասֆալտ։ Սա փաստում են և՛ օպերատիվ ծառայությունները մեր, և՛ մեր շրջայցը, և՛ վարչական ղեկավարների շրջայցը»,- ընդգծեց Արեյանը։

Քաղաքապետի խորհրդականը միաժամանակ ընդգծեց, որ Կենտրոն վարչական շրջանում խցանումների պատճառով տեխնիկան ուշ է գործի դրվել։

««ԵԱՍՄ»-ի մեքենա-մեխանիզմները չեն կարողացել մտնել երթուղի։ Ստիպված՝ ժամը 14։00-ից հետո դիմել ենք պարեկային ծառայությանը, որը սկսել է ճանապարհ բացել մեր մեքենաների համար, և մեքենաները կարողացան աղ ու ավազով մշակել փողոցները»,- նշեց Կամո Արեյանը։

Քաղաքապետ Տիգրան Ավինյանը շնորհակալություն հայտնեց ձնամաքրման աշխատանքների համար՝ դրանք գնահատելով բավարար։

«Նախ պետք է շնորհակալություն հայտնեմ բոլոր այն մարդկանց, ովքեր դեկտեմբերից սկսած մինչև հիմա ինտենսիվ աշխատել են՝ հարյուրավոր մարդիկ, ովքեր օրուգիշեր աշխատել են, որ մեր ճանապարհները անցանելի դառնան, մեր մայթերը անցանելի դառնան։ Եվ իրականում իմ դժգոհությունը կամ մտահոգությունները մեկ նպատակ ունեն, որ հաջորդ անգամ էլ ավելի պատրաստված լինենք, ունենանք ավելի նորարարական լուծումներ։ Ես կարծում եմ, որ հաջորդ տարի մենք պետք է պատրաստված լինենք նորարարական լուծումներով խնդիրները լուծելու, մասնավորապես՝ ջրի լուծույթով աղի նախօրոք ցանումը փողոցներում»,- ասաց Ավինյանը։

Մանրամասները՝ տեսանյութում։

Արփի Հակոբյան