Հնդկաստանում արագ տարածվող վիրուս է բռնկվել, որի դեմ պատվաստանյութ չկա

Հնդկաստանի Արևմտյան Բենգալիայի արևելյան նահանգում առողջապահական մարմինները փորձում են կանխել «Նիպա» վիրուսի բռնկումը։ Այս մասին հայտնել է հնդկական The Economic Times-ը։

Հաղորդվում է վարակման 5 դեպքի և կարանտինում գտնվող 100 մարդու մասին։

«Հաստատված դեպքերի թվում են երկու բուժքույր, մեկ բժիշկ և մեկ առողջապահական անձնակազմի անդամ, որոնցից երկուսի առողջական վիճակը շարունակում է մնալ ծայրահեղ ծանր: Նրանք դեռևս կոմայի մեջ են և հոսպիտալացված են վերակենդանացման բաժանմունքում», – ըստ լրատվամիջոցի՝ ասել է առողջապահության նախարարության պաշտոնյան:

Նշվում է, որ «Նիպա» վիրուսը արագ տարածվում է և ունի բարձր մահացության մակարդակ: IANS-ի հաղորդագրության համաձայն՝ Արևմտյան Բենգալիայի կառավարությունը, երկուշաբթի օրը` առաջին հաստատված դեպքերից ի վեր, մոտ 100 մարդու տնային կարանտին է ուղարկել, որոնցից  մոտ 30-ը խիստ հսկողության տակ են։

Առողջապահության համաշխարհային կազմակերպության տվյալներով՝ այս վիրուսը դասակարգվում է որպես առաջնահերթ հարուցիչ՝ իր համաճարակային ներուժի պատճառով։ Դրա դեմ պատվաստանյութ կամ հատուկ բուժում առկա չէ։ ԱՀԿ-ն նշում է, որ մարդկանց մոտ վարակը կարող է դրսևորվել տարբեր ձևերով՝ ասիմպտոմատիկ վարակից մինչև սուր շնչառական վարակ և մահացու էնցեֆալիտ։

«Նիպա» վիրուսը կարող է մարդկանց փոխանցվել կենդանիներից (օրինակ՝ չղջիկներից կամ խոզերից), կամ աղտոտված սննդից, ինչպես նաև կարող է ուղղակիորեն փոխանցվել մարդուց մարդուն։ Այս խիստ վտանգավոր վարակը բազմիցս բռնկվել է Հարավային և Հարավարևելյան Ասիայում։

Քանի որ հաստատված պատվաստանյութ կամ հատուկ հակավիրուսային բուժում չկա, իսկ անցյալում բռնկումների մահացության մակարդակը տատանվել է 40%-ից մինչև 75%, «Նիպան» շարունակում է լուրջ հանրային առողջության սպառնալիք մնալ այնտեղ, որտեղ բռնկվում է: Այն առաջին անգամ հայտնաբերվել է 1999 թվականին՝ Մալայզիայում խոզաբույծների շրջանում բռնկման ժամանակ։