27.04.2026 | 23:25
ՔԿ նախագահ Արթուր Պողոսյանի մասին գրառման համար ֆեյսբուքյան օգտատիրոջը մեղադրանք է առաջադրվել
Թրամփը համաձայնել է Patriot-ի լրացուցիչ հրթիռներ մատակարարել․ Զելենսկի
Քաղաքականություն
24.01.2026 | 12:01
Ուկրաինան լրացուցիչ հրթիռներ կստանա իր Patriot ՀՕՊ համակարգերի համար: Այս մասին հայտարարել է երկրի նախագահ Վլադիմիր Զելենսկին․ գրում է unian.net-ը՝ հավելելով, որ Զելենսկին այդ մասին ասել է «Տաղանդավոր երիտասարդության երկրորդ ազգային ֆորում»-ի ժամանակ:
Նշվում է, որ համապատասխան համաձայնությունը ձեռք է բերվել ԱՄՆ նախագահի հետ նախօրեին տեղի ունեցած հանդիպման ժամանակ:
«Ես խոսել եմ նախագահ Թրամփի հետ և ստացել եմ, չեմ ասի, թե քանի PAC-3 հրթիռ Patriot-ի համար», – ասել է նա:
PAC-3-ը (Patriot Advanced Capability-3) Patriot համակարգի ամենաարդիական տարբերակն է, որը նախատեսված է հատկապես բալիստիկ հրթիռներ որսալու համար։ Այն օգտագործում է «hit-to-kill» (հարված՝ ոչնչացման համար) տեխնոլոգիան, ինչը թույլ է տալիս ավելի մեծ ճշգրտությամբ խոցել թիրախները։
Պարբերականը նշում է նաև, որ Վլադիմիր Զելենսկին նախկինում հայտարարել էր, որ Ուկրաինան պարբերաբար բախվում է իր առկա ՀՕՊ համակարգերի համար զենիթային հրթիռների պակասի հետ: Օրինակ՝ նա խոստովանել է, որ հունվարի 16-ի առավոտյան «մի քանի» ՀՕՊ համակարգեր առանց հրթիռների են եղել:
«Մենք այստեղ չենք կարող մեղադրել միայն ԱՄՆ-ին։ Որովհետև մենք խոսում ենք մեր էներգետիկ ոլորտը պաշտպանող բոլոր համակարգերի մասին։ Խոսքը միայն Patriot համակարգերի մասին չէ։ Դրանք երբեք բավարար չեն լինի։ Ուկրաինան պատերազմի ընթացքում ներմուծել է համակարգերի լայն տեսականի։ Սա պահանջում է տարբեր հրթիռային փաթեթներ», – այդ ժամանակ ասել էր Զելենսկին։
Թարգմանությունը՝ Անահիտ Խաչատրյանի
