Քաղաքականություն
24.01.2026 | 11:44
Թրամփի վարչակազմը քննարկում է Կուբայի ծովային շրջափակման հարցը՝ երկիր նավթի մատակարարումները կասեցնելու համար: Այս մասին հայտնում է Politico-ն՝ հղում անելով քննարկումներին ծանոթ երեք աղբյուրների:
Թերթի աղբյուրների համաձայն, այս քայլը առաջ են մղում վարչակազմի ներսում Կուբայի կառավարության որոշ քննադատներ, և այն աջակցվում է պետքարտուղար Մարկո Ռուբիոյի կողմից:
Թեև նշվում է, որ վերջնական որոշում չի կայացվել, սակայն նավթի ներմուծման լիակատար շրջափակումը տարբերակներից մեկն է, որը Թրամփին կարող է առաջարկվել Կուբայի կոմունիստական կառավարությունը տապալելու համար, Politico-ին հայտնել են աղբյուրները:
Միևնույն ժամանակ, նրանք ասում են, որ վարչակազմի ներսում շարունակվում են բանավեճերը նման արմատական քայլի նպատակահարմարության վերաբերյալ: Վենեսուելայից նավթի մատակարարումների դադարեցումը, ինչպես նաև այդ ծավալների որոշ վերավաճառքից եկամուտների կորուստը, որոնք Հավանան օգտագործում էր արտարժույթ վաստակելու համար, արդեն լրջորեն թուլացրել են Կուբայի տնտեսությունը: Նավթի ներմուծման լիակատար դադարեցումը կարող է մարդասիրական ճգնաժամ առաջացնել, այդ իսկ պատճառով վարչակազմի որոշ պաշտոնյաներ դեմ են նման միջոցառումներին:
Սպիտակ տունը չի մեկնաբանել այս տեղեկությունը: Եթե Կուբայի ռազմածովային շրջափակման ծրագիրը կյանքի կոչվի, դա ավելի կսրացնի Թրամփի ջանքերը՝ ստիպելու տարածաշրջանային տերություններին հետևել Միացյալ Նահանգների դիրքորոշմանը, նշում է Reuters-ը: Այս քայլը կընդգծի ԱՄՆ վարչակազմի՝ Արևմտյան կիսագնդում գերիշխանության հասնելու նկրտումների լրջությունը։
Հիշեցնենք, որ հունվարի 11-ին Դոնալդ Թրամփը իր սոցիալական ցանցի՝ Truth Social-ի էջում գրել էր, որ Կուբան «տարիներ շարունակ ապրել է Վենեսուելայից ստացվող մեծ քանակությամբ նավթով և փողերով», ապահովելով «անվտանգության ծառայություններ»՝ Ուգո Չավեսի, որը հարավամերիկյան երկրի նախագահն էր 1999-ից 2013 թվականներին, և Նիկոլաս Մադուրոյի՝ Վենեսուելայի առաջնորդի, որին ԱՄՆ բանակի հատուկ նշանակության ուժերը գերի են վերցրել հունվարի 3-ին։
Այնուամենայնիվ, Թրամփը հստակեցրել էր, որ իրավիճակն այժմ կփոխվի. «Այլևս ոչ մի նավթ կամ փող չի հոսի դեպի Կուբա՝ զրո»։ «Ես խստորեն կոչ եմ անում նրանց (Կուբայի իշխանություններին -խմբ.) գործարք կնքել (Միացյալ Նահանգների հետ -խմբ.), քանի դեռ ուշ չէ», – սպառնացել էր Սպիտակ տան ղեկավարը։
Կուբայի իշխանությունները վրդովմունքով էին արձագանքել Թրամփի հայտարարություններին։ «Կուբան չի ստանում և երբեք չի ստացել որևէ դրամական կամ նյութական փոխհատուցում որևէ երկրին մատուցված անվտանգության ծառայությունների համար», – նույն օրը իր X միկրոբլոգում գրել էր Կուբայի արտաքին գործերի նախարար Բրունո Ռոդրիգեսը։
Իր հերթին, նախագահ Միգել Դիաս Կանելը շեշտել էր, որ Կուբան «ազատ, անկախ և ինքնիշխան երկիր է»։ «Ոչ ոք չի թելադրում, թե ինչ անենք», – X-ում գրել է լատինաամերիկյան առաջնորդը։ «Նրանք, ովքեր ամեն ինչ, նույնիսկ մարդկային կյանքերը, վերածում են բիզնեսի, իրավունք չունեն Կուբային որևէ բան, բացարձակապես որևէ բան ասել», – հավելել էր նա։
Թարգմանությունը՝ Անահիտ Խաչատրյանի
