10.09.2026 | 18:39
Իրանը ժամանակավոր դադարեցրել է էներգակիրներ փոխադրող օտարերկրյա նավերի բեռնափոխադրման վճարը
Մասկը վերադարձել է մեծ քաղաքականություն և շարունակում է ֆինանսավորել հանրապետականներին. WSJ
Քաղաքականություն
23.01.2026 | 23:21
Ամերիկացի միլիարդատեր Իլոն Մասկը վերադառնում է մեծ քաղաքականություն 2026 թվականի միջանկյալ ընտրություններից առաջ, չնայած մի քանի ամիս առաջ հայտարարել էր իր ընկերությունների կառավարման վրա կենտրոնանալու մտադրության մասին, գրում է The Wall Street Journal-ը: Աշխարհի ամենահարուստ մարդն այս տարի արդեն 10 միլիոն դոլար է նվիրաբերել Սենատի հանրապետական թեկնածուին, և նրա լարված հարաբերությունները նախագահ Դոնալդ Թրամփի հետ բարելավվել են, գրում է The Insider-ը։
Մասկի քաղաքական թիմը, ըստ որոշ տեղեկությունների, վերջին շաբաթներին հանդիպումներ է ունեցել պոտենցիալ կապալառուների հետ՝ միջանկյալ ընտրությունների նախապատրաստման աշխատանքներից առաջ, կենտրոնանալով թվային և SMS մարքեթինգի փորձագետների վրա: Մասկի գլխավոր քաղաքական ստրատեգ Քրիս Յանգը հանդիպումներ է անցկացնում կապալառուների, որոշ թեկնածուների և նրանց թիմերի հետ: Մասկի ծրագրերը դեռևս վերջնականապես որոշված չեն. նա քննարկում է՝ արդյո՞ք ներդրում կատարել America PAC-ի միջոցով, որն աջակցել է Թրամփի 2024 թվականի նախագահական քարոզարշավին, թե՞ այլ քաղաքական կոմիտեների միջոցով։
Մասկը 10 միլիոն դոլար է նվիրաբերել գործարար Նեյթ Մորիսին, որը Կենտուկիում հավակնում է սենատոր Միչ Մաքքոնելիի տեղին։ 2025 թվականի հունիսից ի վեր Մասկը շուրջ 42 միլիոն դոլարի քաղաքական նվիրատվություններ է կատարել, այդ թվում՝ 27 միլիոն դոլար՝ America PAC-ին, 10 միլիոն դոլար՝ Ներկայացուցիչների պալատում և Սենատում հանրապետականներին աջակցող հիմնադրամներին և 5 միլիոն դոլար՝ Թրամփի կողմնակից կոմիտեին։
2024 թվականի ընտրություններում Մասկը գրեթե 300 միլիոն դոլար է ծախսել Թրամփին և հանրապետականներին աջակցելու համար՝ դառնալով երկրի ամենամեծ հայտնի քաղաքական դոնորը։
Թրամփը և Մասկը հրապարակային վիճել էին անցյալ տարվա մայիսին՝ Մասկի կողմից իր ստեղծած Սպիտակ տան վարչությունում՝ DOGE-ում պաշտոնավարելուց հետո։ WSJ-ն նշում է, որ նրանց միջև հաշտեցումը պրագմատիկ դաշինք է. Թրամփը հասանելիություն է ստանում Մասկի գումարներին և տեխնիկական ենթակառուցվածքներին, մինչդեռ Մասկը պահպանում է ազդեցությունը վարչակազմի ներսում։ Սեպտեմբերին Մասկը նստել էր Թրամփի օթյակում պահպանողական ակտիվիստ Չարլի Քըրքի հիշատակի արարողության ժամանակ, իսկ հունվարի սկզբին նա լուսանկար էր հրապարակել նախագահի և առաջին տիկնոջ հետ ճաշելիս։
Աշնանային միջանկյալ ընտրությունները կարող են մարտահրավեր լինել հանրապետականների համար, քանի որ գործող նախագահի կուսակցությունը պատմականորեն տեղեր է կորցնում Կոնգրեսում միջանկյալ ընտրություններում։
Անցյալ տարվա վերջին Սպիտակ տան աշխատակազմի ղեկավար Սյուզի Ուայլսը Vanity Fair-ին տված հարցազրույցում կոշտ մեկնաբանություններ էր արել Իլոն Մասկի մասին՝ նրան համեմատելով «քարացած Նոսֆերատուի» հետ և անվանելով «հայտնի կետամին օգտագործող»։
Թարգմանությունը՝ Էմմա Չոբանյանի
