«Պիտի ձյունը մի քիչ դնի, նոր դրանք սկսեն աշխատել»․ ինչո՞ւ է մայթ մաքրող տեխնիկան «հանգստանում» Նոր Նորքի թաղապետարանի դիմաց․ ՏԵՍԱՆՅՈՒԹ

Բլոգեր Էդուարդ Հայրումյանը տեսանյութ էր հրապարակել՝ ցույց տալով, որ ձյան առատ տեղումների ընթացքում մայթ մաքրող չորս միավոր տեխնիկա կանգնած է Նոր Նորք վարչական շրջանի թաղապետարանի դիմաց։

Ինչո՞ւ տեխնիկան չի շահագործվում՝ Factor TV-ն հետաքրքրվեց վարչական շրջանի ղեկավար Մարատ Սևոյանից։ Նրա խոսքով՝ տվյալ պահին դեռևս բավարար քանակի ձյուն չի տեղացել, որպեսզի տեխնիկայի ներգրավումը արդյունավետ լինի։

«Պիտի ձյունը մի քիչ դնի, նոր դրանք սկսեն քշել, մաքրել, որ արդյունավետ լինի։ Հակառակ դեպքում նույն աշխատանքը ստիպված կլինենք մի քանի անգամ անել։ Այս պահին մեր աշխատակիցներն աղ են ցանում»,- ասաց Սևոյանը։

Պաշտոնյան ընդգծեց, որ մայթ մաքրող տեխնիկան շահագործվում է ոչ թե վարչական շրջանի, այլ ԵԱՍՄ-ի աշխատակիցների կողմից։

«Նոր Նորքի տարածքում այս պահին աշխատում է հինգ մեծ տրակտոր, ևս մեկ-երկուսն ունեն տեխնիկական խնդիրներ, սակայն մի քանի ժամվա ընթացքում դրանք կրկին դուրս կգան աշխատանքի։ Բացի այդ, ունենք նաև KARCHER մակնիշի բազմաֆունկցիոնալ երկու մեքենաներ»,- ասաց վարչական շրջանի ղեկավարը։

Մարատ Սևոյանի հավաստմամբ՝ վարչական շրջանը ձնամաքրման աշխատանքների համար օգտագործում է առկա ողջ ռեսուրսը։

Հիշեցնենք, որ մայթ մաքրող այդ տեխնիկան Երևանի քաղաքապետարանը ձեռք է բերել 2023-ին՝ 50 միավորի համար վճարելով 34 մլն 600 հազար ՀՀ դրամ։ Քիչ առաջ էլ ԵԱՍՄ հիմնարկի տնօրեն Սաշա Կատվալյանը ֆեյսբուքում տեսանյութ է հրապարակել՝ տեղեկացնելով, որ մայրաքաղաքում աշխատում է աղ ցանող 47 տեխնիկա։ 

Արփի Հակոբյան