Խորհուրդ եմ տալիս ընդդիմությանն այլևս չվերադառնալ այս դահլիճ․ Էդուարդ Աղաջանյան․ ՏԵՍԱՆՅՈՒԹ

«Քննարկվում է մի օրենքի նախագիծ, որով խափանվում է դիտորդական առաքելությունների անվան քողի ներքո քաղաքական միավորների մուտքը ընտրատեղամասեր, որտեղ վերջիններս, ենթադրաբար, ոչ թե ընտրական գործընթացների վերահսկողություն պետք է իրականացնեն, այլ քաղաքական ուղղորդումներ»,- այս մասին Ընտրական օրենսգրքում փոփոխութոյւններ կատարելու վերաբերյալ նախագծի քննարկման ժամանակ նշեց իշխանական պատգամավոր Էդուարդ Աղաջանյանը։

«Եվ, ահա, այս պարզ նախագծի քննարկման համատեքստում մեր ընդդիմությունը հերթական անգամ որոշում է կայացնում լքել այս դահլիճը և, ինչն է տարօրինակ և զարմանալի, երբ պարոն Արծվիկ Մինասյանը մոտենում է այս ամբիոնին, սկզբում ասում է, որ մենք դեմ ենք, որ արտահերթ կարգով այս հարցը քննարկվի, քիչ անց ես կմոտենամ այս ամբիոնից և կներկայացնեմ, թե բովանդակային ինչի հետ խնդիր ունենք։

Երկու րոպե հետո մոտենում է այս ամբիոնին և որևէ բովանդակային անդրադարձ քննարկվող հարցին չի ներկայացնում։ Ընդհանրապես, ասում է մոտավորապես հետևյալը, որ սա մի նախագիծ է, որով մենք, այսինքն մեր իշխանությունը, պատրաստվում է ընտրակեղծիքները հետագա մեր կողմից կազմակերպել և այդ ընտրակեղծիքները օրինականացնել, մի ընդդիմություն, որը երբևէ մեր կողմից կազմակերպված որևէ ընտրություն, եթե չեմ սխալվում, չի վիճարկել, խոսում է սրա մասին և հեռանում է։

Ես կարծում եմ, որ այս քայլը կարելի է բնութագրել որպես հեռացող ընդդիմության մանիֆեստ, և խորհուրդ եմ տալիս և կոչ եմ անում մեր ընդդիմությանը այլևս չվերադառնալ այս դահլիճ և մնալ հեռացած այս դահլիճից առհավետ»,- նշեց նա։

Մանրամասները՝ տեսանյութում։