Սոլովյովի և Դուգինի հայտարարություններն առայժմ միայն խոսքեր են, բայց ռուսական էլիտայի մտածողությունն են արտահայտում և վտանգավոր են․ Կուատ Դոմբայ․ ՏԵՍԱՆՅՈՒԹ

Ռուսաստանից երեքից հինգ տարի կպահանջվի՝ Ուկրաինայում պատերազմի ավարտից հետո իր բանակը վերականգնելու համար, որից հետո այն կրկին սպառնալիք կդառնա հետխորհրդային երկրների համար։ Factor TV-ին տված հարցազրույցում այս մասին հայտարարեց ղազախ փորձագետ Կուատ Դոմբայը։

Նա ընդգծեց՝ Մոսկվայի վարքագիծը հետխորհրդային տարածքում ուղղակիորեն կախված է նրանից, թե ինչպես կավարտվի Ուկրաինայում պատերազմը։ Ընդ որում, ըստ Դոմբայի, ռուսաստանցի հանրային գործիչների, մասնավորապես՝ Վլադիմիր Սոլովյովի և Ալեքսանդր Դուգինի կոշտ հայտարարությունները դեռևս պարզապես խոսքեր են, բայց դրանք արտացոլում են ռուսական էլիտայի մի մասի իրական մտածելակերպը, հետևաբար, չպետք է անտեսվեն։ Փորձագետը նաև նշեց, որ Ղազախստանը չափազանց կոշտ է արձագանքել նման հայտարարություններին։ Նրա խոսքով՝ տարածաշրջանում ոչ ոք չի ձգտում Ռուսաստանի հետ բախման, բայց դրանից բխող սպառնալիքները հակառակ ազդեցությունն ունեն և միայն ուժեղացնում են հարևան պետությունների ցանկությունը՝ դիվերսիֆիկացնել իրենց արտաքին քաղաքականությունը։

Դոմբայը կարծում է, որ Ղազախստանն ավելի ու ավելի ակտիվ է նավթի և այլ ապրանքների արտահանման այլընտրանքային ուղիներ փնտրում՝ բախվելով Ռուսաստանի տարածքով տարանցման խնդիրների։ Միաժամանակ, ըստ փորձագետի հանրապետությունը հետաքրքրություն է ներկայացնում Դոնալդ Թրամփի համար՝ իր հսկայական հանքային պաշարների և Արևմուտքի կախվածությունը Չինաստանից նվազեցնելու ներուժի շնորհիվ։

Մասնագետը նաև նշեց կարևոր ժողովրդագրական գործոն. ղազախստանցիների շուրջ 75%-ը երբեք չի ապրել ԽՍՀՄ-ում, ուստի ռուսական քարոզչությունը գործնականում ոչ մի ազդեցություն չունի նրանց վրա: Այս ֆոնին, ըստ Դոմբայի, Կենտրոնական Ասիայի երկրների միջև տնտեսական կապերն ավելի արագ են զարգանում, քան Ռուսաստանի հետ նրանց առևտուրը:

Խոսելով տարածաշրջանային դինամիկայի մասին՝ փորձագետը նշեց, որ Մոսկվան նկատելիորեն նյարդայնացած է Հայաստանի և Ադրբեջանի միջև հարաբերությունների կարգավորմամբ: Միաժամանակ, Դոմբայն ընդգծեց Հայաստանի ռազմավարական կարևորությունը և վստահություն հայտնեց, որ Ղազախստանի հետ նրա հարաբերությունները հետևողականորեն կամրապնդվեն:

Մասնագետը նաև ուշադրություն հրավիրեց փոփոխվող առևտրային հոսքերի վրա. 2025 թվականին Ղազախստանի առևտրի ծավալը Չինաստանի հետ երկու անգամ գերազանցել է Ռուսաստանի հետ առևտրաշրջանառության ծավալներին, ինչը, նրա կարծիքով, հստակ ցույց է տալիս տարածաշրջանում տնտեսական կապերի արագացող վերակողմնորոշումը:

Հարցազրույցն ամբողջությամբ՝ տեսանյութում:

Սամվել Մելիքսեթյան