«Ուկրաինական զորքերը պետք է լքեն Դոնբասը». Պեսկով

Կրեմլի խոսնակ Դմիտրի Պեսկովը մեկնաբանել է տեղեկությունները, որ տարածքային հարցը քննարկվելու է Ռուսաստանի, Ուկրաինայի և ԱՄՆ-ի պատվիրակությունների միջև առաջին եռակողմ հանդիպման ժամանակ՝ ԱՄԷ մայրաքաղաքում, BBC-ի ռուսական ծառայությունը։

«Նախ՝ մենք, բնականաբար, չենք ցանկանում հրապարակայնորեն մանրամասնել քննարկվող դրույթները, ուստի ես չեմ կարող և չեմ ասի, թե ինչ է նկատի առնվում «Անքորիջի բանաձևով», քանի որ մենք դա համարում ենք անտեղի։ Ռուսաստանի դիրքորոշումը լավ հայտնի է՝ Ուկրաինան և նրա զինված ուժերը պետք է լքեն Դոնբասը, դրանք պետք է դուրս բերվեն։ Սա շատ կարևոր պայման է։ Կան նաև այլ նրբերանգներ, որոնք մնում են բանակցային օրակարգում»,- լրագրողներին ասել է Պեսկովը։

Ռուսաստանի նախագահի խորհրդական Յուրի Ուշակովը Վլադիմիր Պուտինի և ԱՄՆ նախագահ Դոնալդ Թրամփի ներկայացուցիչների բանակցություններից հետո խոսել էր «Անքորիջի բանաձևի» մասին։

«Ամենակարևորն այն է, որ մեր նախագահի և ամերիկացիների միջև այս բանակցությունների ընթացքում ևս մեկ անգամ հաստատվեց, որ առանց տարածքային հարցը լուծելու՝ ըստ Անքորիջում համաձայնեցված բանաձևի, երկարաժամկետ կարգավորման հասնելու հույս չկա»,- ասել էր Ուշակովը։

Axios-ին աղբյուրները հայտնել են, որ տարածքային հարցը կլինի Աբու Դաբիում կայանալիք եռակողմ հանդիպման գլխավոր թեման։

Լրագրողների հարցերին պատասխանելով՝ Ուկրաինայի նախագահ Վլադիմիր Զելենսկին հաստատել է. «Դոնբասի հարցն առանցքային է։ Այն կքննարկվի և կքննարկվի այն ձևաչափերով, որոնք երեք կողմերը կհամարեն նպատակահարմար։ Աբու Դաբիում՝ այսօր և վաղը»։