23.01.2026 | 21:14
Ադրբեջանի քաղհասարակության անդամները դիմել են ԵԽԽՎ-ին՝ Բաքվի դեմ քայլեր ձեռնարկելու կոչով
Ընդդիմությունը թրքացումից վախենում է, բա ինչո՞ւ է Քոչարյանի օրոք 54 թուրքական կապիտալով ընկերություն բացվել․ Արման Եղոյան․ ՏԵՍԱՆՅՈՒԹ
Քաղաքականություն
23.01.2026 | 20:00
ՀՀ ԱԺ «Քաղաքացիական պայմանագիր» խմբակցության պատգամավոր Արման Եղոյանը Factor TV-ի եթերում անդրադարձել է ԱՄՆ նախագահ Դոնալդ Թրամփի ստեղծած «Խաղաղության խորհրդին» Հայաստանի անդամակցությանը, տարածաշրջանային կոմունիկացիաներին և ընդդիմության քննադատություններին։
Պատասխանելով հարցին, թե ինչ է փնտրում Հայաստանը Թրամփի նախաձեռնած խորհրդում, Եղոյանը նշել է․ «Այդ խորհրդում Հայաստանը փնտրում է խաղաղություն, կայունություն, առևտրաշրջանառություն, բարեկեցիկ զարգացում, ապաշրջափակում և այն ամենը, ինչ մենք հայտարարել ենք։ Իսկ ինչո՞ւ չպիտի միանար»։
Պատգամավորը անտեղի է համարել այն մտավախությունը, թե դա կարող է խանգարել Ֆրանսիայի կամ ԵՄ-ի հետ հարաբերություններին, որոնք դեմ են արտահայտվել Թրամփի նախաձեռնությանը․ «Նրանք էլ իրենց քաղաքականությունն ունեն։ Ամեն պետություն ունի իր քաղաքականությունը, իր մարտահրավերները, իր շահերը․․․ Մենք Եվրամիության հետ էլ, հատկապես Ֆրանսիայի հետ, շատ ակտիվ համագործակցում ենք, և ԱՄՆ-ի հետ էլ շատ ակտիվ համագործակցում ենք, բայց մեկը մյուսին խոչընդոտ չի»։
Անդրադառնալով Թրամփի և Փաշինյանի հանդիպման կադրերի շուրջ համացանցում ծավալված քննարկումներին, մասնավորապես՝ Թրամփի՝ «Փաշինյանին աչքով անելու» դրվագին, Եղոյանը քննադատել է «սքրինշոթներով» վերլուծություններ անելու մշակույթը․ «Ես դա հեգնում էի, որովհետև յուրաքանչյուր շարժումից կարելի է հազար հատ սքրինշոթ անել․․․ Մարդը ներդրում է ունեցել այդ համաձայնագրի նախաստորագրման, մյուս հայտարարության ստորագրման գործում։ Հիմա ինչո՞ւ չասի, ինչո՞ւ չներկայացնի»։
Արձագանքելով «թրքացման» մասին ընդդիմության մեղադրանքներին և ըստ ընդդիմության՝ «Թրամփի ուղու» կառուցմանը ադրբեջանական կողմի հնարավոր մասնակցության մասին մեղադրանքներին, Եղոյանը ներկայացրել է վիճակագրություն․ «Սերժ Սարգսյանի կառավարման ժամանակ Հայաստանում բացվել է թուրքական կապիտալով 54 ընկերություն, Ռոբերտ Քոչարյանի ժամանակ՝ 52, Նիկոլ Փաշինյանի ժամանակ՝ 24։ Ավելի քան երկու անգամ քիչ»։
Հարցազրույցն ամբողջությամբ՝ տեսանյութում։
Ռոբերտ Անանյան
