UFC-ի թեթև քաշային կարգի դասակարգման առաջատար Արման Ծառուկյանը անդրադարձել է ռուսաստանցի Իսլամ Մախաչևի հետ չկայացած ռևանշ մենամարտին։
«Ինչպե՞ս կարող էի վախենալ Իսլամից, եթե առաջին անգամ նրա դեմ մենամարտի էի դուրս եկել 22 տարեկանում։ Այդ ժամանակ Մախաչևն արդեն 6 կամ 7 մենամարտ ուներ UFC-ում։ Ինձ զանգել էին մրցաշարի մեկնարկից 2-3 շաբաթ առաջ։ Ես կարգավորել էի քաշս ու մենամարտել նրա հետ։ Դա բավական հավասար մենամարտ էր։ Ինչպե՞ս կարող էի վախենալ Իսլամից, եթե 6 տարի պատրաստվել էի այդ ռևանշին։ Եթե նույնիսկ պարտվեի, կցուցադրեի լավ մենամարտ, կվաստակեի գումար ու կմեծացնեի ճանաչելիությունս»,- Ծառուկյանի խոսքը մեջբերում է Sportskeeda-ն։
Արման Ծառուկյանն Իսլամ Մախաչևի դեմ պետք է մենամարտեր 2025թ․ հունվարին կայացած UFC 311 մրցաշարում, սակայն մեջքի վնասվածքի պատճառով հրաժարվել էր դուրս գալ օկտագոն։ Ռուսաստանցի մարտիկն արդեն տեղափոխվել է կիսամիջին քաշային կարգ ու նվաճել UFC-ի չեմպիոնի տիտղոսը։
29-ամյա Ծառուկյանը խառը մենամարտերում մասնակցել է 26 հանդիպման, տարել 23 հաղթանակ ու կրել 3 պարտություն։ 2019-ին հայ մարտիկը UFC-ում նորամուտը նշել էր Իսլամ Մախաչևի դեմ մենամարտով ու պարտվել միավորներով։
