29.10.2026 | 10:04
Ֆուտզալի Հայաստանի չեմպիոնը կամային հաղթանակ է տարել Չեմպիոնների լիգայում
ԱՄՆ-ն դուրս է եկել Առողջապահության համաշխարհային կազմակերպությունից` առանց 260 միլիոն դոլար պարտքը վճարելու
Քաղաքականություն
23.01.2026 | 15:18
Միացյալ Նահանգներն ավարտել է Առողջապահության համաշխարհային կազմակերպությունից (ԱՀԿ) դուրս գալու գործընթացը։ Հայտարարությունը հրապարակվել է հունվարի 22-ին՝ ԱՄՆ Առողջապահության և մարդկային ծառայությունների նախարարության կայքում, գրում է DW-ի ռուսական ծառայությունը։
Bloomberg-ը և Reuters-ը հաղորդում են, որ ԱՄՆ կառավարությունը չի վճարել կազմակերպությանը շուրջ 260 միլիոն դոլարի չափով պարտքը։ Associated Press-ը գնահատում է այս պարտքն ավելի քան 130 միլիոն դոլար։
Ամերիկյան կողմը, մասնավորապես, բացատրում է ԱՀԿ-ից իր դուրս գալը «կազմակերպության կողմից չինական Ուհան քաղաքում ծագած COVID-19 համավարակին անբավարար արձագանքով, անհապաղ անհրաժեշտ բարեփոխումներ չձեռնարկելով և ԱՀԿ անդամ պետությունների անհարկի քաղաքական ազդեցությունից անկախություն ցուցադրելու պատճառով»։
ԱՄՆ նախագահ Դոնալդ Թրամփը 2025 թվականի հունվարի 20-ին՝ Սպիտակ տուն վերադառնալուց հետո առաջին օրը, ստորագրել է գործադիր հրամանագիր, որով հայտարարում էր երկրի՝ ԱՀԿ-ից դուրս գալու մտադրության մասին։
Լրատվամիջոցները կազմակերպությունից դուրս գալու գործընթացը մեկ տարի անց ավարտելը բացատրում են ԱՄՆ իրավական պահանջներով. նման ծրագրերի մասին պետք է ծանուցում տրվի 12 ամիս առաջ։ Գործակալությունները նշում են, որ օրենքը նաև պահանջում է բոլոր չվճարված վճարների վճարում։
ԱՄՆ Առողջապահության նախարարության և Պետքարտուղարության համատեղ հայտարարության մեջ նշվում է, որ ԱՄՆ-ն մեկ տարի շարունակ չի ֆինանսավորել ԱՀԿ-ի նախագծերը և որևէ նվիրատվություն չի կատարել։
«Ամերիկացի ժողովուրդը վճարել է ավելին, քան բավարար է»,- նշել է Պետքարտուղարության ներկայացուցիչը։
ԱՄՆ-ն ԱՀԿ-ի ամենամեծ առանձին դոնորն էր, ներդրումը կազմում էր կազմակերպության ընդհանուր ֆինանսավորման շուրջ 18%-ը։ ԱՄՆ-ի դուրս գալու պատճառով ԱՀԿ-ն մինչև 2026 թվականի կեսերը կկրճատի իր աշխատակազմի մոտ մեկ քառորդը։
Թարգմանությունը՝ Էմմա Չոբանյանի
